Калі ў Слоніме пройдзе асенні кірмаш і чаму ён не адбыўся 29 верасня

У Слоніме першы асенні кірмаш, на якім можна будзе набыць сельскагаспадарчую прадукцыю, адбудзецца 6 кастрычніка. Пра гэта карэспандэнту “ГС” паведаміла ў чацвер, 27 верасня, спецыяліст упраўлення сельскай гаспадаркі Слонімскага райвыканкама Вольга Тоўсцік.

—Сёння мы толькі рыхтуем распараджэнне наконт правядзення кірмашоў, і першы з іх адбудзецца 6 кастрычніка, — заўважыла Вольга Іванаўна.
На пытанне карэспандэнта, чаму на сайтах Міністэрства гандлю Рэспублікі Беларусь і Гродзенскага аблвыканкама стаіць інфармацыя наконт правядзення сезонных кірмашоў у Слоніме 29 верасня, 13 і 20 кастрычніка, як раней і паведамляла “ГС”, спецыяліст адказала, што гэтае пытанне будзе высветлена.
У той жа чацвер абвяржэнне наконт правядзення кірмашу ў Слоніме 29 верасня было выстаўлена на сайт нашай газеты. На жаль, не ўсе нашы чытачы з’яўляюцца карыстальнікамі сайта і таму новую інфармацыю не ўдалося давесці ўсім.   
У суботу, 29 верасня, абласное радыё апавяшчала сваіх слухачоў наконт таго, што сельскагаспадарчыя кірмашы ў гэтыя выхадныя праходзяць у Слоніме і Ваўкавыску. Пісалі пра гэта і рэгіянальныя сайты. І 29 верасня некалькі дзясяткаў чалавек прыйшлі на Оперную вуліцу ў Слоніме, каб набыць неабходную прадукцыю. Адзін з такіх пакупнікоў, уведзеных у зман ня-спраўджанай інфармацыяй, патэлефанаваў карэспандэнту з просьбай растлумачыць, чаму гандаль у Слоніме не адбыўся, як пра гэта паведамлялі газета і радыё.   
У панядзелак, 1 кастрычніка, карэспандэнт вырашыла сама высветліць, чаму на сайтах Міністэрства гандлю РБ і Гродзенскага аблвыканкама з’явілася такая інфармацыя. Як сказала па тэлефоне кансультант упраўлення арганізацыі гандлю і паслугаў Міністэрства гандлю РБ Інга Богук, даты правядзення кірмашоў у Слоніме — 29 верасня, 13 і 20 кастрычніка — былі ўключаны ў  графік на аснове пісьма аб правядзенні кірмашоў Гродзенскага аблвыканкама ад 12 верасня 2012 года. У сваю чаргу, ва ўпраўленні гандлю і паслугаў Гродзенскага аблвыканкама карэспандэнту адказалі, што такія даты правядзення кірмашу ў нашым горадзе яны ўнеслі ў абласны графік паводле пісьма аддзела гандлю і бытавых паслугаў упраўлення эканомікі Слонімскага райвыканкама за адпаведным нумарам ад 12 верасня.
Карэспандэнт патэлефанавала ў Слонімскі райвыканкам спецыялісту Наталлі Ганчарук і запыталася, чаму ж усё-такі 29 верасня кірмаш у Слоніме не адбыўся, калі афіцыйнае пісьмо з райвыканкама паведамляла гэтую дату. Наталля Віктараўна зазначыла, што распараджэнне наконт правядзення кірмашоў яшчэ не падпісанае і што даты 29 верасня, 13 і 20 кастрычніка былі толькі плануемыя, бо яшчэ не скончыліся ўборачныя работы. Спецыяліст дадала, што першы кірмаш запланаваны на 6 кастрычніка.
У любым выпадку, “ГС” будзе інфармаваць нашых чытачоў наконт дат правядзення сезонных кірмашоў. Бо запланаванае не заўсёды ажыццяўляецца…          

P.S.
У Ваўкавыску, паводле інфармацыі http://www.region.grodno.by/ru/, арганізуюць
9 кірмашоў. Сезонны гандаль у гэтым райцэнтры ўжо пачаўся ў мінулыя выхадныя, як і было запланавана. У Іўі новы ўраджай пачалі прадаваць яшчэ ў сярэдзіне верасня, там плануюць правесці 8 кірмашоў. У Шчучыне ўжо прайшлі тры кірмашы і запланаваныя яшчэ два. Свіслач правядзе
4 кірмашы.