На Зэлевеншчыне не даюць сустрэцца з апазіцыйнымі кандыдатамі

7 верасня кіраўніцтва СВК “Славуцічы” Зэльвенскага раёна адмяніла запланаваную сустрэчу з кандыдатамі ў дэпутаты па Слонімскай выбарчай акрузе Іванам Шэгам і Міхаілам Караткевічам.

—Пра сустрэчу з выбаршчыкамі раніцай 7 верасня на мехдвары мы дамовіліся з кіраўніцтвам гаспадаркі яшчэ 27 жніўня. 5 верасня там пацвердзілі, што дамовы застаюцца ў сіле і да пачатку працоўнага дня мы можам сустрэцца і пагутарыць з людзьмі. А палове восьмай гадзіны 7 верасня мы прыехалі на мехдвор. Людзі ўжо былі на месцы, але кіраўнік гаспадаркі заявіў, што няма калі весці размовы, патрэбна ехаць працаваць, ды параіў нам ісці сустракацца з выбаршчыкамі ў сельскі клуб, які ў той дзень быў адкрыты ўжо ў восем гадзін. Паколькі гэта ўжо быў не першы выпадак, калі на Зэльвеншчыне нам зрывалі сустрэчы з выбаршчыкамі, то мы паехалі ў Зэльву, каб пагутарыць на гэты конт са старшынёй райвыканкама. Аднак старшыня нас не прыняў, а сакратарка параіла запісацца на прыём. Пасля такой сустрэчы мы напісалі ў Кнігу заўваг прапанову аб паляпшэнні працы райвыканкама. А наконт фактычнага сабатажу нашых сустрэч з выбаршчыкамі з боку ўладаў у Зэльвенскім раёне мы накіравалі скаргу на імя старшыні Цэнтральнай выбарчай камісіі Лідзіі Ярмошынай. У лісце мы апісалі, як праходзіла наша агітацыйная кампанія, дзе на працягу тыдня толькі 15 мінут удалося пагутарыць з людзьмі ў адным месцы. Раней, як вы ўжо ведаеце, мы пісалі скаргі і ў акруговую выбарчую камісію. Запланаваную ў Зэльве сустрэчу з выбаршчыкамі 11 верасня мы адмянілі. Відавочна, што туды няма сэнсу ехаць, — расказаў карэспандэнту “ГС” пра ход сваёй агітацыйнай кампаніі ў суседнім раёне Іван Шэга.