“З глыбінь жыцця” Анатоля Іверса

Апошняя па ліку кніга Анатоля Іверса “З глыбінь жыцця” выйшла якраз напярэдадні 100-гадовага юбілею паэта, які прыхільнікі яго творчасці адзначылі 15 траўня.

Кніга Анатоля Іверса “З глыбінь жыцця” ў падзагалоўку падаецца яе складальнікам Сяргеем Чыгрыном як “Нататкі прамінулай эпохі”. Сапраўды, эпоха, у якую і пра якую пісаў свае нататкі Іверс, па мерках чалавечага жыцця, прамінула даўно. Пайшлі ў лепшы свет ды сталіся зместам той эпохі героі пісьменніка.  Валянцін Таўлай, Гальяш Леўчык, Піліп Пестрак, Янка Купала, Аляксандр Заградзін, Вера Харужая, Марыя Прэшкіна, Антон Валынчык, Максім Бурсевіч, Ганна Кароль… Не стаміліся ад прозвішчаў? Кожнае з іх — свая гісторыя і гісторыя Слонімшчыны ды Беларусі ў кантэксце гісторыі Расійскай імперыі ці СССР.  Але й шырэй браў Іверс у такіх артыкулах, як, напрыклад, “Мае адносіны да Скарыны” ці “Беларуская мова ў маім жыцці”.

Пра катаванні ў польскай дэфензіве, пра бальшавіцкія допыты і антыфашысцкае падполле ў Слоніме таксама з цікавасцю сёння прачытае аматар гісторыі роднага краю. Але найперш гэтую кніжку Анатоля Іверса варта было б рэкамендаваць для школаў як дапаможнік па краязнаўстве.

Нататкі пра самыя сур’ёзныя і страшныя рэчы напісаны так, што чытаюцца як дэтэктыў. Лёгкі аўтарскі стыль вельмі дапамог бы засваенню школьнікамі гісторыі, тым больш гісторыі роднага краю.

“З глыбінь жыцця” стала трэцяй кнігай твораў старэйшага беларускага пісьменніка Анатоля Іверса, якія выйшлі ў сталічным выдавецтве “Кнігазбор” у 2011 і 2012 гадах. Па словах складальніка кнігі і аўтара прадмовы да яе Сяргея Чыгрына, “З глыбінь жыцця” Анатоля Іверса можна будзе набыць у кнігарні на Першамайскай вуліцы ў Слоніме.