Чатыры слонімскія прадпрыемствы і іх кіраўнікі ўвайшлі ў энцыклапедыю “Лепшыя людзі Беларусі”

Чатыры прамысловыя прадпрыемствы горада Слоніма і іх кіраўнікі ўключаны ў другі выпуск альманаха «Лепшыя людзі Беларусі».

На старонках гэтага выдання, як паведаміла карэспандэнту «ГС» Вольга Шышла, супрацоўнік выдавецтва «Спец-Адрас Еўропа», адзначаны калектывы і кіраўнікі драбільна-сартавальнага завода, друкарні, вінаробнага завода і камвольна-прадзільнай фабрыкі. У кожнага з названых прадпрыемстваў, як адзначаюць складальнікі альманаха, свой шлях да дасягнення поспеху і ў кожнага ёсць чаму павучыцца.
Так, драбільна-сартавальны завод, які з 1991 года ўзначальвае Уладзімір Жолудзеў, з’яўляецца адным з асноўных пастаўшчыкоў нярудных будаўнічых матэрыялаў для будаўнічага комплексу краіны.
Дырэктар Гродзенскага абласнога унітарнага паліграфічнага прадпрыемства “Слонімская друкарня” Анатоль Лагуцік здолеў вывесці друкарню ў лік лепшых у вобласці. За заслугі ў развіцці паліграфіі, высокае прафесійнае майстэрства ён узнагаро-джаны нагрудным знакам «Выдатнiк друку Беларусi».
Слонімскі вінаробны завод ужо каля 15 гадоў паспяхова ўзначальвае Міхаіл Акулік, дзякуючы намаганням якога да прадпрыемства было далучана некалькі новых вытворчых пляцовак, пераўтвораных са стратных у стабільныя аддзяленні завода.
Слонімская КПФ, якой кіруе Валянціна Вянскоўская, з’яўляецца адным з найбуйнейшых прадпрыемстваў лёгкай прамысловасці краіны па выпуску паўшарсцяной пражы.
На пытанне карэспандэнта “ГС”, чаму на старонкі альманаха не патрапілі калектывы і работнікі, напрыклад, сферы адукацыі ці медыцыны, Вольга Шышла адказала, што гэтыя чатыры прадпрыемствы былі рэкамендаваныя ўпраўленнем эканомікі Слонімскага райвыканкама. Магчыма, адзначыла Вольга Шышла, у выпуску, які ўбачыць свет у наступным годзе, заявак ад Слонімшчыны будзе больш і сфера адбору персаналій пашырыцца, бо, як дадала субяседніца, іх рэдакцыя вядзе актыўны пошук заслужаных грамадзян і паспяховых арганізацый. І рэкамендаваць іх могуць не толькі выканкамы, але і грамадскія, прафесійныя арганізацыі, кіраўнікі прадпрыемстваў.
Прачытаць пра поспехі землякоў можна будзе ўжо ў траўні. Альманах увойдзе ў склад вялікай міжнароднай энцыклапедыі “Лепшыя людзі”. Удзел у гэтым праекце таксама прымаюць Расія, Украіна, Казахстан, Азербайджан.