Вясна і прыгажосць - паняцці нераздзельныя

Па-сапраўднаму ацаніць жаночую прыгажосць могуць, канешне ж, мужчыны. Гэта ўлічылі і арганізатары конкурсу, запрасіўшы прадстаўнікоў моцнага полу весці конкурс і аб’ектыўна ацаніць яго. Камунікабельныя, сімпатычныя вядучыя Дзмітрый Роўба і Уладзімір Андрыеўскі – сёлетнія выпускнікі сельскагаспадарчага ліцэя – выдатна справіліся са сваімі ролямі, “запальвалі” залу трапным жартам і ўдалым экспромтам. Невыпадкова і журы конкурсу ўзначальваў мужчына.

Пры першым дэфіле дзяўчат у народным касцюме вядучыя прадставілі кожную з іх публіцы, расказалі пра іх захапленні і мары. Ксенія Самусенка любіць спорт і захапляецца фатаграфіяй, Дзіяна Пільчук лічыць, што кожны дзень прыносіць штосьці цудоўнае і непаўторнае, і гэта трэба цаніць. Спартыўныя прыхільнасці Таццяны Міхалоўскай – футбол і гандбол, дзяўчына ўпэўнена, што любоў і клопат аб бліжніх узвышае чалавека. Юлія Несцер любіць маляваць і гуляць у баскетбол. Захапленні Веры Пачобут – музыка і валейбол, а Анастасіі Яндальцавай – танцы і плаванне. Анастасія Даніловіч любіць спорт і хоча жыць актыўна і змястоўна.

Дзяўчаты-прыгажуні паказалі сябе яшчэ ў некалькіх убраннях – у вячэрнім, у мадэльным, у вясельным, канешне, у апошнім кожная з іх была непараўнанай! Заўважым, сцэна – не бераг мора, трэба быць даволі смелым і раскаваным, каб дэфіліраваць у купальным касцюме. Канкурсанткі справіліся з гэтым заданнем дастойна.

Мерапрыемства прынесла шмат добрых эмоцый не толькі дзяўчатам, што змагаліся за карону Міс Шчучын-2011, але і гледачам у зале, бо для іх таксама ладзіліся конкурсы, вынікі якіх адбіваліся на балах кожнай з прыгажунь. Напрыклад, фотасесію кожнай дзяўчыны на экране мультымедыйнай устаноўкі гледачы ацэньвалі гарачынёй апладысментаў. А яшчэ юнакі збіралі ў гледачоў аўтографы на карысць сваёй канкурсанткі. Сярод гледачоў разыгрываліся і прызы – фота і аўтограф прэтэндэнтак на званне “Міс Шчучын-2011”. Дарэчы, менавіта гледачы вызначылі “Міс сімпатый гледачоў”, ёю стала Анастасія Даніловіч.

Абвяшчаючы вынікі конкурсу, старшыня журы А.В. Шкіндзераў, начальнік аддзела жыллёва-камунальнай гаспадаркі райвыканкама, падзякаваў дзяўчатам за іх смеласць, актыўнасць, і пажадаў ім стаць студэнткамі ўстаноў, пра якія яны мараць. І вось названа імя пераможцы конкурсу прыгажосці – званне “Міс Шчучын-2011” заваявала Юлія Несцер, дзесяцікласніца першай гарадской школы.

Тытул “Віцэ-Міс Шчучын-2011” атрымала Анастасія Яндальцава.

Юля вельмі хвалявалася, адказваючы на пытанні. Дзяўчына прызналася, што самым складаным момантам для яе быў першы выхад на сцэну. А потым яна адчула падтрымку залы, сяброў-аднакласнікаў і сваёй сям’і. Юля заканчвае дзесяты клас, у яе цэлы год для прыняцця рашэння, якую прафесію выбраць. Хочацца пажадаць ёй удачы і такой жа настойлівасці ў дасягненні мэты, якую яна праявіла на конкурсе.

Варта адзначыць, што вельмі ўпрыгожылі конкурсную праграму выступленні спевакоў Наталлі Казаковай, Надзеі Курашовай, Юрыя Барысевіча, Дзмітрыя Паваргі і, канешне, рэп-групы Дэ-Факто “Спрут і Гном”. Арганізатары мерапрыемства ўдзячны за спонсарскую дапамогу гаспадыні вясельнага салона “Таццяна” Т.І. Сайдак. Рэжысёр раённага Дома культуры Юлія Бучылка – яшчэ малады работнік культуры, і гэты конкурс – адна з нямногіх яе творчых работ. Мяркуючы па водгуках удзельніц і гледачоў, работа была зроблена добра.
Ала УЛАДЗІМІРАВА.
Фота аўтара.