Парад жартаў і інтэлекту

Дзевяць каманд школьнікаў прынялі ўдзел у раённым фестывалі Клуба вясёлых і знаходлівых, які прайшоў у СШ №1 г. Шчучына і быў арганізаваны аддзелам адукацыі Шчучынскага райвыканкама і цэнтрам творчасці дзяцей і моладзі.

– Хочацца адзначыць вельмі высокі ўзровень падрыхтоўкі ўсіх без выключэння ўдзельнікаў, – дзеліцца сваімі ўражаннямі галоўны спецыяліст аддзела адукацыі Вольга Пятроўна Чыжык. – І журы, і гледачы атрымалі сапраўднае эмацыянальнае задавальненне ад іскрамётных жартаў, цікавых выступленняў і індывідуальных праграм кожнай каманды. Абсалютным пераможцам стала каманда СШ №2 г. Шчучына.

У фестывалі прынялі ўдзел каманды Васілішкаўскай, Першамайскай, Ражанкаўскай, Каменскай, Галавічпольскай школ, гімназіі, СШ №1 і СШ №2 г. Шчучына, каманда ЦТДіМ.

Выдатным акцёрскім майстэрствам вызначаліся ўдзельнікі каманд СШ №2 і СШ №3 г. Шчучына, цэнтра творчасці дзяцей і моладзі, Ражанкаўскай, Галавічпольскай, Першамайскай школ. Цікавыя аўтарскія матэрыялы выкарыстаны камандамі гарадскіх школ, гімназіі, цэнтра творчасці дзяцей і моладзі, Галавічпольскай, Ражанкаўскай школ.

– У наступным годзе мы будзем праводзіць гульні па этапах, – працягвае Вольга Пятроўна. – Пачнём з занальных тураў, гарадскога, а затым – раённы. Зборную каманду СШ №2 г. Шчучына будзем рыхтаваць для ўдзелу ў абласных гульнях.

У якасці дамашняга задання камандам было прапанавана падрыхтаваць выступленне на тэму “Быць прадпрымальным – неабходна”. І тут рабяты праявілі свае самыя лепшыя творчыя і інтэлектуальныя здольнасці.

Лепшымі ігракамі гульні былі прызнаны Надзея Дысько – вучаніца СШ №3 і Антон Грыневіч – вучань гэтай жа школы, які выступаў за каманду цэнтра творчасці дзяцей і моладзі.
Другое месца на фестывалі КВЗ заняла каманда Галавічпольскай школы, трэцяе – гімназіі.

Падрыхтавала Ганна РУДСКАЯ