Інтарэсы дзяцей абараняюць дарослыя

У “прамой лініі” на тэму “Абарона правоў і законных інтарэсаў непаўналетніх” прынялі ўдзел прадстаўнікі розных сфер – адукацыі, медыцыны, службы занятасці, сацыяльнай, праваахоўнай і іншых службаў, якія стаяць на варце законных інтарэсаў непаўналетніх грамадзян. Пытанні тычыліся самых розных аспектаў названай тэмы.

– У якім выпадку непаўналетні можа быць прызнаны ў сацыяльна небяспечным становішчы?
Д.Я. Войцюль, дырэктар раённага сацыяльна-педагагічнага цэнтра:
– Калі хлопчык ці дзяўчынка ва ўзросце да 18 гадоў знаходзіцца ў становішчы, дзе не задавольваюцца яго асноўныя жыццёвыя патрэбы, калі ён ці яна ў выніку беспрытульнасці або безнагляднасці ўчыняе правапарушэнне, калі бацькі, усынавіцелі, апекуны вядуць амаральны лад жыцця, злоўжываюць сваімі правамі і жорстка абыходзяцца з непаўналетнім або іншым неналежным чынам выконваюць абавязкі па выхаванні ці ўтрыманні, калі існуе небяспека для яго жыцця або здароўя, ёсць усе падставы прызнаць, што непаўналетні знаходзіцца ў сацыяльнанебяспечным становішчы.

Калі дзіця аказваецца ў экстрэмальнай жыццёвай сітуацыі, яго змяшчаюць у прытулак, дзе аказваюць сацыяльна-педагагічную, псіхалагічную, медыцынскую і іншую дапамогу.

– Ці кампенсуюць бацькі расходы на ўтрыманне дзяцей у выпадку, калі дзеці ў іх адабраны, а бацькоўскіх правоў яны не пазбаўлены?
Ж.В. Карпук, намеснік старшыні камісіі па справах непаўналетніх райвыканкама:
– Абавязаныя бацькі кампенсуюць дзяржаве расходы на ўтрыманне дзяцей у наступных выпадках: калі дзеці адабраны па рашэнні камісіі па справах непаўналетніх, калі дзеці адабраны на падставе рашэння суда без пазбаўлення бацькоўскіх правоў і калі пазбаўлены бацькоўскіх правоў.

Не кампенсуюць расходы на ўтрыманне дзяцей бацькі, прызнаныя недзеяздольнымі, а таксама бацькі, якія не могуць выконваць бацькоўскія абавязкі па стане здароўя на падставе медыцынскага заключэння ўрачэбна-кансультацыйнай камісіі, выдадзенага дзяржаўнай установай аховы здароўя.

– Як можа быць пакараны дарослы, які спажываў алкагольны напітак разам з непаўналетнім?
В.Р. Мікалайчык, намеснік начальніка РАУС, начальнік міліцыі грамадскай бяспекі:
– У адпаведнасці з арт. 17.4 Кодэкса аб адміністрацыйных правапарушэннях прадугледжана адміністрацыйная адказнасць за ўцягненне непаўналетняга ў антыграмадскія паводзіны шляхам пакупкі для яго дарослай асобай алкагольных, слабаалкагольных напояў і піва, сумеснага распіцця спіртнога. За гэтае правапарушэнне можа быць накладзены штраф у памеры ад 10 да 30 базавых велічынь.

– Якая работа вядзецца з “цяжкімі” падлеткамі, што стаяць на ўліку ў інспекцыі па справах непаўналетніх?
В.Г. Ткачук, начальнік аддзела па справах моладзі райвыканкама:
– З 2009 года на базе райкама ГА “БРСМ” дзейнічае клуб “Выбар”, мэта якога – папярэджанне супрацьпраўных дзеянняў у падлеткавым асяродку, прыцягненне падлеткаў у калектыўныя справы, у спартыўна-аздараўленчую дзейнасць. Актывісты клуба ладзяць паходы, экскурсіі, трэнінгі, дыспуты, віктарыны і г.д. Сёлета актыўны ўдзел прынялі падлеткі ў турніры па хакеі, дні адкрытых дзвярэй у аддзеле ўнутраных спраў райвыканкама, трэнінгу “Мы – супраць наркотыкаў!” і г.д.

– Дзе падчас летніх канікул могуць папрацаваць школьнікі?
Г.С. Паўлюкевіч, начальнік аддзела дзяржаўнай службы занятасці ўпраўлення па працы, занятасці і сацыяльнай абароне райвыканкама:
– У час летніх канікул будуць арганізаваны брыгады з 10 і больш чалавек, якія зоймуцца рамонтнымі работамі, добраўпарадкаваннем тэрыторыі. Такія брыгады ў чэрвені будуць створаны і дзейнічаць у Шчучынскім вучэбна-вытворчым камбінаце, у гімназіі, гарадскіх школах.

У сельскагаспадарчым ліцэі брыгада з 20 чалавек будзе працаваць у ліпені на працягу 10 рабочых дзён.

Навучэнская моладзь можа прыняць удзел у грамадскіх аплачваемых работах па зборы лекавых траў у РУСП “Саўгас “Вялікае Мажэйкава”, зборы ягад у СТАА “Клубніка Плантс”, праполцы цукровых буракоў у гаспадарках раёна. Ёсць дамоўленасць з РУП ЖКГ і ЖЭС аб прыёме на работу навучэнцаў у летні перыяд часу.

– Як атрымаць для дзіцяці пуцёўку ў санаторый?
М.У. Гуменнік, раённы педыятр:
– У адпаведнасці з медыцынскімі паказаннямі доктар, які лечыць дзіця, выдае даведку, што яно мае патрэбу ў санаторна-курортным лячэнні. Гэтая даведка прадстаўляецца ў Прадстаўніцтва Гродзенскага абласнога ўпраўлення Рэспубліканскага цэнтра па аздараўленні і санаторна-курортным лячэнні насельніцтва па Шчучынскім раёне. Згодна з чаргой дзіцяці выдаецца пуцёўка ў санаторый.

– Дзе змогуць дзеці адпачыць сёлета ў час летніх канікул?
Ж.І. Мяцько, намеснік начальніка раённага аддзела адукацыі:
– Сёлета плануецца аздаравіць 2275 дзяцей. У чэрвені, у першую змену, у лагеры “Касмадром” будуць адпачываць гурткоўцы пазашкольных устаноў раёна. Змена “Навука” плануецца другім заездам. Лагер будзе працаваць у чатыры змены.

На арэндаванай базе кругласутачнага знаходжання ў лагеры “Пралеска” плануецца аздаравіць 50 школьнікаў. У сезонна-аздараўленчых лагерах дзённага знаходжання будуць адпачываць больш за 1300 школьнікаў. Таксама будуць дзейнічаць ваенна-праваслаўны лагер “Дружына” і лагер юных турыстаў.

– Якую дапамогу могуць аказаць сям’і, якая выхоўвае непаўналетніх дзяцей, у тэрытарыяльным цэнтры сацыяльнага абслугоўвання насельніцтва?
С.В. Шанчук, дырэктар тэрытарыяльнага цэнтра сацыяльнага абслугоўвання насельніцтва:
– У цэнтры можна бясплатна пракансультавацца па юрыдычных і псіхалагічных пытаннях, у тым ліку па “тэлефоне даверу” (28-8-50). Можна атрымаць і гуманітарную дапамогу (адзенне, абутак), для гэтага неабходна прадставіць дакумент, які сведчыць асобу, даведкі аб стане сям’і і аб даходах за тры месяцы, якія папярэднічалі моманту звароту. (Даход на аднаго члена сям’і не павінен перавышаць бюджэт пражытачнага мінімуму на дату звароту).

– Чаму з непаўналетніх бярэцца плата за лоўлю рыбы на возеры в. Кульбачына?
А.І. Лябецкі, галоўны спецыяліст юрыдычнага сектара райвыканкама:– На падставе рашэння Шчучынскага раённага Савета дэпутатаў ад 30.06.2009 г. №101 “Аб перадачы ў арэнду водных аб’ектаў” возера ля в. Кульбачына плошчай 10 га перададзена ў арэнду Таварыству з абмежаванай адказнасцю “СпецАгратур” тэрмінам на 25 гадоў. У адпаведнасці з п.п. 3.2.7 пункта 2 дагавора арэнды ад 1.07.2009 года №13, заключанага паміж Шчучынскім райвыканкамам і ТАА “СпецАгратур”, арандатар абавязаны прадаставіць насельніцтву паслугу па лоўлі рыбы на арандуемым водным аб’екце. Плата за аказанне данай паслугі бярэцца ў адпаведнасці з заканадаўствам Рэспублікі Беларусь.
Падрыхтавала Ала УЛАДЗІМІРАВА.