На вяршыні поспеху - алімпіяднікі

Каманда школьнікаў і гімназістаў нашага раёна заваявала 15 дыпломаў у абласным этапе рэспубліканскай алімпіяды. Вучні школ нашага раёна ўвайшлі ў абласны рэйтынг па ўсіх прадметах за выключэннем астраноміі. Паспяхова каманда выступіла па 8 прадметах: руская, нямецкая і англійская мовы, біялогія, геаграфія, гісторыя, грамадазнаўства і працоўнае навучанне. Сем месцаў заваявала гімназія.
У рэспубліканскім этапе вызначыліся чацвёра шчучынскіх рабят.
Другі год запар становіцца пераможцам рэспубліканскай алімпіяды па геаграфіі вучань СШ №2 г. Шчучына Мікіта Вараб’еўскі. Свайго мэтанакіраванага вучня падтрымлівае і ва ўсім дапамагае яму настаўніца геаграфіі Данута Браніславаўна Куц.

Першае месца заняла сёлета на рэспубліканскай алімпіядзе па грамадазнаўстве і вучаніца 10 класа гімназіі Эмілія Банацкая. Не першы год з ёю займаецца настаўніца гісторыі і грамадазнаўства Жанна Генрыхаўна Гайда.

Другое месца па біялогіі прывёз з рэспубліканскай алімпіяды вучань 11 класа гімназіі Аляксей Хвайніцкі. Яго педагог Валянціна Іванаўна Шэйгерэвіч была кіраўніком каманды па біялогіі ад Гродзенскай вобласці. Яна падрыхтавала многіх пераможцаў і прызёраў алімпіяд рознага ўзроўню.

А гімназістка Анжэла Шымко – вучаніца Ліліі Іванаўны Доста – заняла трэцяе месца па англійскай мове і надзвычай уразіла ўсіх членаў камісіі сваім вымаўленнем. Другі год запар яна ўдзельнічае ў рэспубліканскім этапе.

– Для ўсіх дзяцей гэта былі вельмі сур’ёзныя іспыты, – гаворыць намеснік начальніка аддзела адукацыі Жанна Іванаўна Мяцько. – Як паказала практыка, вельмі складана перамагчы ў абласной алімпіядзе адразу па некалькіх прадметах. Праведзены эксперымент сябе не апраўдаў. Калі вучань рыхтуецца па адным прадмеце – вынікі нашмат лепшыя.

У гэтым годзе ўпершыню прынята рашэнне Гродзенскага аблвыканкама аб узнагароджанні настаўнікаў, якія падрыхтавалі пераможцаў рэспубліканскай алімпіяды, і Шчучынскага райвыканкама -- абласной алімпіяды.
Ганна РУДСКАЯ.