Аперацыя “Утылізацыя”, або 22 кг “Чыстай энергіі”

– Справа ў тым, што ў нас аб’яўлена аперацыі “Утылізацыя”, – расказвае Алена Яўгеньеўна Лісоўская, намеснік дырэктара па метадычнай рабоце Дзяржаўнай гімназіі г.Шчучына. – Арганізатары акцыі – кампанія МТС і гімназія №19 г.Мінска – прапанавалі сабраць як мага больш выкарыстаных батарэек і акумулятараў для правільнай утылізацыі. Такім чынам, кожны ўдзельнік не толькі становіцца канкурсантам і мае магчымасць выйграць прыз, але і выратоўвае навакольнае асяроддзе ад забруджвання.

Экалагічнае выхаванне, увогуле, займае важнае месца ў жыцці нашай гімназіі, – працягвае Алена Яўгеньеўна. – Мы выкарыстоўваем сістэму экалагічнага менеджменту, праводзім розныя тэматычныя мерапрыемствы, рэгулярна публікуем экалагічныя справаздачы. А яшчэ вучымся і вучым беражліва адносіцца да рэсурсаў. Дзеці самастойна кантралююць эканамічнае выкарыстанне электраэнергіі, вады, паперы: у нас устаноўлены рэзервуар для збору дажджавой вады, скрыні для макулатуры. А нядаўна гімназія атрымала сертыфікат адпаведнасці “ Белый аист”, які пацвярджае, што мы паспяхова ўкаранілі сістэму кіравання навакольным асяроддзем. Нашы вучні заўсёды актыўна ўдзельнічаюць у розных конкурсах.
Як аказалася, у акцыі “ Чыстая энергія” прынялі ўдзел не толькі гімназісты, але і выкладчыкі. Так, В. Ч. Гваздоўская прыдумала шэраг матэматычных задач, звязаных з тэмай конкурсу, а Т.В.Уласава дабавіла ў агульную капілку 144 батарэйкі!
Усяго ў гімназіі сабралі 22 кг выкарыстаных батарэек!
– Мне дапамог тата. Ён працуе майстрам гадзіннікаў, – расказвае дзесяцікласнік Павел Яхоўскі. – Усяго назбіралася 136 батарэек.
– А я хадзіў па кватэрах, тлумачыў, што ў гімназіі праходзіць акцыя, прапаноўваў здаць непатрэбныя батарэйкі і акумулятары, – дадае Антон Мархоцкі з 6 “А”. У мяне іх…Хвілінку…
Гімназіст выбег з кабінета і хутка вярнуўся, трымаючы ў руках яшчэ 6 батарэек.
– 137! І тры акумулятары, – дадаў задаволены Антон.
– Ты збіраў іх дзеля конкурсу? – цікаўлюся ў хлапчука.
– А вы ведаеце, што ўсяго адна батарэйка ці акумулятар мабільнага тэлефона, выкінутыя ў смецце, забруджваюць каля 20 квадратных метраў зямлі?– ставіць “пытанне рубам” Антон.
– І нават могуць каштаваць жыцця аднаму вожыку, дзвюм вавёркам, або зробяць неэкалагічнымі 400 літраў вады! – ажывілася Даша Пацук – лідар па збору батарэек.
Шчыра кажучы, я гэтага не ведала…
Цікаўлюся ў дзяўчынкі, як ёй удалося назбіраць ажно 766 батарэек.
Аказалася, Даша Пацук заваявала першынство, дзякуючы дапамозе родных і сяброўкі Насці Мацюш. А на днях дзяўчынка разам з Т.В.Уласавай накіравалася ў Мінск, дзе арганізатары падвялі выніку конкурсу. Дамоў гімназістка і выкладчыца прывезлі свае заслужаныя прызы.
Усе сабраныя батарэйкі гімназісты збіраюцца змясціць у спецыяльны кантэйнер, які для гэтых мэт выстаўлены ў Доме гандлю. Дарэчы, мне захацелася ўпэўніцца, наколькі ён запатрабаваны ў звычайнага абывацеля. Як аказалася, яго не вельмі тут “піяраць”: стаіць сабе ў закуточку ля лесвіцы, якая вядзе на другі паверх (побач з “Кафетэрыем”). А, да прыкладу, у магазіне аграгарадка Орля такі кантэйнер стаіць на бачным месцы .
Пасля збору старыя батарэйкі накіруюцца на прадпрыемствы па абыходжанню з адходамі на ўтылізацыю, што называецца, па ўсіх правілах.

Ганна ВІЛЕНЦЭВІЧ.
Фота аўтара.

Наша даведка
* Адна батарэйка ўтрымлівае такія цяжкія металы, як ртуць, нікель, кадмій, свінец, літый, марганец і цынк, якія маюць уласцівасць назапашвацца ў жывых арганізмах. Нават невялікая іх колькасць небяспечная для здароўя чалавека.
* Кожная сям’я ў год выкідвае ад 100 да 500 грамаў выкарыстаных элементаў сілкавання. А гэта небяспечна для навакольнага асяроддзя.