Калегі, сябры, аднадумцы

Голосов пока нет

У чацвер ў райвыканкаме адбылася сустрэча былых кіраўнікоў раёна, прысвечаная Дню пажылых людзей. У гэты дзень Вікенцій Макаравіч Бабко спяшаўся ў райвыканкам у прыўзнятым настроі: яго чакалі калегі, з якімі ён не адзін год працаваў разам. Прыемна ў сяброўскай кампаніі ўспомніць мінулае: дырэктарстваваў у лясгасе, вырашаючы вытворчыя пытанні, імчаў на аб’екты на матацыкле з каляскай…

…У актавай зале сабраліся каля трыццаці ветэранаў. Паважаных калег віншаваў са святам старшыня раённага Савета дэпутатаў Іван Юльянавіч Сакалоўскі:

– Менавіта вашымі нястомнымі рукамі быў закладзены падмурак будучага дабрабыту нашага раёна. Дзякуй за добрасумленную працу! Жадаю вам моцнага здароўя і шчасця!
Удзельнікі сустрэчы наведалі Гродзенскі занальны інстытут раслінаводства НАН Беларусі, дзе мелі магчымасць бліжэй пазнаёміцца з яго дзейнасцю.
– Я прысвяціла працы ў інстытуце больш за трыццаць гадоў, – гаворыць Ядвіга Уладзіміраўна Белаводская, – працавала намеснікам дырэктара па навуцы. Магу з упэўненасцю сказаць, што інстытут зрабіў значны крок наперад у сваім развіцці і з’яўляецца адным з вядучых у краіне. Тут працуюць высокакваліфікаваныя спецыялісты, адданыя сваёй справе. А калі практыка і навука ідуць побач, то і вынік заўжды высокі! Не дзіва, што нашу прадукцыю добра ведаюць у рэспубліцы, і яна карыстаецца шырокім попытам.
Пабывалі ветэраны і на масласырзаводзе, дзе мелі магчымасць бліжэй пазнаёміцца з вытворчым працэсам, даведацца аб апошніх навінках вытворчасці і нават прадэгуставаць сырамалочную прадукцыю.

У Каменцы гасцей сустрэлі з хлебам-соллю, паказалі мясцовыя славутасці, а настаўніца гісторыі Соф’я Баляславаўна Кахновіч правяла экскурсію па касцёле святога Антонія Падуанскага. Багаццем экспанатаў уразіў і школьны музей.
Удзельнікі сустрэчы наведалі гаспадаркі СВУ “Пратасаўшчына” і СВК “Дэмбрава”.
– Усё сваё жыццё я прысвяціў працы на зямлі, – дзеліцца Сцяпан Васільевіч Лянцэвіч. – Доўгі час працаваў старшынёй калгаса “Бальшавік”, адкуль і выйшаў на заслужаны адпачынак. Прызнацца, вельмі задаволены ўбачаным: магутная тэхніка, высокакваліфікаваныя кадры, механізацыя вытворчых працэсаў… У такіх умовах працаваць – адно задавальненне!
– Дзякуй райвыканкаму за сапраўдны восеньскі падарунак! – не стрымала эмоцый Аліна Баляславаўна Максімовіч. – Многія з нас 5-7 гадоў не наведвалі вытворчыя аб’екты. Прагрэс не стаіць на месцы, і за гэты час многае змянілася: тое, аб чым мы калісьці марылі, сёння – рэальнасць! Упэўнена, што і далей гэткімі ж тэмпамі будуць укараняцца ў наша жыццё перадавыя тэхналогіі і інавацыі!

Аляксандр КАСПЯРЧУК.
Фота аўтара.