Уборка – экзамен на гаспадарлівасць

На чарговым пасяджэнні райвыканкама, куды былі запрошаны кіраўнікі прадпрыемстваў аграпрамысловага комплексу і іншых арганізацый, гаворка ішла аб гатоўнасці сельгасгаспадарак раёна да ўборкі зерневых і зернебабовых культур і ходзе нарыхтоўкі кармоў. Сітуацыю прааналізаваў намеснік начальніка ўпраўлення сельскай гаспадаркі і харчавання Ю.Г. Бяляўскі.

Вёсцы дапамогуць гараджане

На жаль, на момант гэтай прынцыповай размовы яшчэ не ўсе гаспадаркі раёна былі стопрацэнтна падрыхтаваны да правядзення жніва. Асноўныя прычыны – недахоп фінансавых сродкаў для набыцця запчастак для імпартнай тэхнікі і праблемы з механізатарскімі кадрамі. У СВК “Орля”, саўгасе “Навадворскі”, э/б “Руткевічы” не ў поўным аб’ёме камбайны і зернесушыльныя гаспадаркі забяспечаны сродкамі пажаратушэння, не былі праведзены заняткі і праверка ведаў па бяспецы эксплуатацыі сушыльных агрэгатаў. Як тлумачылі кіраўнікі, усе недахопы будуць выпраўлены ў бліжэйшыя дні.

У рамках Указа Прэзідэнта “Аб фінансаванні ў 2011 годзе Рэспубліканскай праграмы аснашчэння сельскагаспадарчай вытворчасці сучаснай тэхнікай” нашаму раёну выдзелена 15 зернеўборачных камбайнаў і тры рапсавыя прыстаўкі. З улікам той тэхнікі, што ёсць у раёне, уборку плануецца правесці за 19-20 дзён. Усяго будуць убраны зерневыя і зернебабовыя на плошчы 27,7 тысячы гектараў, а калі не лічыць кукурузу – на 25,7 тысячы гектараў. З іх азімыя – 13,1 тыс. га і яравыя – 14,6 тыс. га.

Да пачатку масавай уборкі будуць уведзены ў эксплуатацыю два зернесушыльныя комплексы магутнасцю да 30 тон у гадзіну.

На ўборцы ўраджаю плануецца задзейнічаць больш за 670 механізатараў, каля 190 з іх будуць працаваць на зернеўборачных камбайнах. А атрад механізатарскіх кадраў папоўніцца 35-цю выпускнікамі і практыкантамі сельгасліцэя, а яшчэ 55-цю спецыялістамі з прамысловых прадпрыемстваў раёна. Для дапамогі ва ўборцы саломы зноў жа з ліку работнікаў арганізацый і прадпрыемстваў створаны механізаваныя звенні.

Старшыня раённага Савета дэпутатаў І.Ю.Сакалоўскі нагадаў кіраўнікам сельгасгаспадарак аб неабходнасці забяспечыць саломай сельскія падвор’і.

Быць з кармамі – значыць быць з малаком і мясам

Як падкрэсліў Ю.Г.Бяляўскі, праграма вытворчасці кармоў прадугледжвае нарыхтаваць 90997 тыс. тон травяных кармоў у кармавых адзінках. З іх 11656 тыс. – сена, 138,6 тоны сенажу, 202,5 тоны сіласу. Выкананне намечанага дазволіць назапасіць па 23,5 ц кармавых адзінак на ўмоўную галаву жывёлы. А ў якасці летніх кармоў будзе выкарыстана 75 тыс. тон зялёнай масы.

Як жа насамрэч рэалізуецца гэта праграма? У шэрагу нават досыць моцных гаспадарак уборка траў першага ўкосу неапраўдана зацягнулася. Маруднымі тэмпамі ідуць работы па перазалужэнні ў саўгасе “Вялікае Мажэйкава”, СВУ “Пратасаўшчына”, э/б “Руткевічы”.

Для забеспячэння летнімі зялёнымі кармамі сёлета закладзены многакампанентныя шматгадовыя пашы на плошчы 390 га. І калі ў СВК “Шчучынаграпрадукт”, “Дэмбрава”, “Жалудоцкі” і іншых такая работа вялася належным чынам, то ў СВК “Орля”, э/б “Руткевічы” і некаторых іншых гаспадарках да гэтага яшчэ не прыступалі.

Быў адзначаны і такі момант: на ўзрошчванні траў гаспадаркі раёна не выкарыстоўваюць магчымасць супрацоўніцтва з нашым занальным інстытутам раслінаводства. Закупіўшы там насенне траў, можна было б істотна паўплываць на якасць кармавой базы.

Старшыня райвыканкама С.І.Ушкевіч засяродзіў увагу кіраўнікоў гаспадарак на тым, што ў параўнанні з мінулым годам зараз ідзе адставанне па ўзроўні продажу малака. Між тым, малако сёння надзвычай запатрабавана перапрацоўчай прамысловасцю, а значыць гаспадаркі губляюць жывыя грошы.

Над вырашэннем гэтых і многіх іншых праблем сёння павінны актыўна працаваць у прадпрыемствах АПК.

На пасяджэнні райвыканкама былі разгледжаны і многія іншыя пытанні, якія тычацца выдачы ліцэнзій, выкарыстання маёмасці камунальнай уласнасці, рэгулявання жыллёвых адносін і г.д.

Па ўсіх пытаннях былі прыняты адпаведныя пастановы.

Таццяна СТУПАКЕВІЧ.