Хай гучыць шчаслівы смех дзетвары!

Пляцоўка каля раённага Дома культуры пералівалася ўсімі колерамі вясёлкі. Самыя маленькія непаседы стараліся аказацца ў эпіцэнтры падзей – іх цікавіла ўсё без выключэння! І строгія мамы не забаранялі ім шлёпаць па лужах, бегаць па лужку і нават вымазвацца салодкай ватай і марожаным – гэта быў іх дзень! Ад душы весяліліся дашкаляты: вадзілі карагоды, бегалі, скакалі. Так кранальна было назіраць, як радуецца дзетвара, як блішчаць вачаняткі ў хлопчыкаў і дзяўчынак і свецяцца ад шчасця.

…Віталіна Панімаш і Кацярына Гваздоўская – вядучыя святочнага канцэрта, зачытваюць пасланне міру, якое падрыхтавала шчучынская дзетвара. Дружна ўзлятаюць угару надзіманыя шарыкі з тэкстам паслання. Дзеці не хочуць нічога незвычайнага, толькі жыць пад мірным небам і радавацца кожнаму новаму дню.

Для некаторых гасцей першы дзень лета аказаўся двайным святам – 1 чэрвеня яны адзначаюць і Дзень свайго нараджэння. Менавіта ім быў аказаны вялікі гонар – узняць сцяг Краіны дзяцінства. Імяніннікі атрымалі салодкія падарункі.

Са святам павіншавала хлопчыкаў і дзяўчынак намеснік начальніка аддзела адукацыі райвыканкама Жанна Іванаўна Мяцько. Яна звярнулася і да дарослых, каб нагадаць, што шчасце дзяцей – у іх руках. Для кожнага маленькага жыхара нашай краіны няма нічога важней за любоў і клопат мам і татаў.

Юныя артысты раённага Дома культуры і цэнтра творчасці дзяцей і моладзі дарылі гасцям свята свае музычныя нумары. А выступленне выхаванцаў гуртка “Дамашні гадаванец” Марка Сільвановіча, Яўгенія Тулі, Анастасіі Гой, Надзеі Асцюкевіч і Людмілы Варонік са сваімі чатырохногімі сябрамі проста пакарыла ўсіх без выключэння гледачоў. Дарэчы, займаецца з юнымі дрэсіроўшчыкамі кіраўнік гуртка цэнтра творчасці Наталля Валянцінаўна Варонік.

Дзетвары не прыходзілася сумаваць на свяце. Прадстаўнікі школ, пазашкольных устаноў і дзіцячых садкоў гасцінна запрашалі на свае гульнявыя пляцоўкі, дзе ладзіліся конкурсы, эстафеты, праводзіліся інтэлектуальныя спаборніцтвы. Супрацоўнікі РАНС прыехалі на свята на пажарнай машыне і дэманстравалі дзецям магчымасці аварыйна-выратавальнай тэхнікі. І, канешне, якое свята без конкурсу малюнкаў на асфальце? На гэты раз яго праводзілі работнікі РДК. Прыгожыя мяккія цацкі атрымалі пераможцы Кірыл Колас, Карына Рудская і Аляксандра Куцэйка. Без падарунка не застаўся ніводны ўдзельнік конкурсу.

…Лета пачалося цудоўным святам. Няхай яно так і пройдзе: весела і радасна.
Ганна РУДСКАЯ. Фота аўтара.