Дзе былі балоты – будзе травастой

Толькі ў мінулым годзе рабочыя Шчучынскага ПМС правялі аграмеліярацыйныя мерапрыемствы на плошчы 300 гектараў у саўгасах “Вялікае Мажэйкава”, “Першамайск-агра” і СВК “Астрына”. Была таксама праведзена рэканструкцыя меліярацыйных аб’ектаў у СВУ “Пратасаўшчына” і СВК “Дэмбрава”. Работнікі прадпрыемства прымалі таксама ўдзел у будаўніцтве Гродзенскай гідраэлектрастанцыі.

Зараз меліяратары працуюць на няўдобіцах і забалочаных палетках у эксперыментальнай базе “Руткевічы”, саўгасах “Вялікае Мажэйкава”, “Навадворскі”, птушкафабрыцы і ААТ “Васілішкі”.

За мінулы год Шчучынскае прадпрыемства меліярацыйных сістэм выканала работ і паслуг на суму 8008 мільёнаў рублёў, што больш запланаванага на 8,2 працэнта. Тэмп росту да ўзроўню 2009 года склаў 113,1 працэнта. Атрымана 307 мільёнаў прыбытку ад рэалізацыі работ і паслуг.

Узрасла на прадпрыемстве і прадукцыйнасць працы. А сярэднямесячная заработная плата склала 1 мільён 140 тысяч рублёў.

Кожны год абнаўляецца матэрыяльна-тэхнічная база. Летась тут набылі 3 новыя трактары “Беларус”, 2 МАЗы, бульдозер, 2 экскаватары, аўтамабілі ГАЗ. У гарадскім пасёлку Астрына восем сямей работнікаў ПМС палепшылі свае жыллёвыя ўмовы – усяліліся ў новы прыгожы дом.

У ААТ “Васілішкі”, адразу за вёскай Аляксандраўка, меліяратары вядуць культур-тэхнічныя работы на 62 гектарах асушальных і 96 гектарах забалочаных зямель. Дзве брыгады, а гэта 11 чалавек, кожны дзень пракладваюць 600-800 метраў дрэнажу, карчуюць хмызнякі, капаюць каналы, займаюцца ворывам і культывацыяй палеткаў. Брыгадзірам дрэнажнай брыгады тут Леанід Іосіфавіч Павайба. На прадпрыемстве ён больш за 30 гадоў. Да работы адносіцца добрасумленна. За гэта яго паважаюць у калектыве, даручаюць адказныя ўчасткі.

Увогуле, у гэтым годзе меліяратары здадуць у карыстанне ААТ “Васілішкі” амаль 1000 гектараў добраўпарадкаванай зямлі.
Сяргей ГАРДЗЕЙЧЫК.
Фота аўтара.