“Анёл жыве ў тваім сэрцы, ты – у сэрцы анёла”

Пад такой назвай 1 чэрвеня прайшло святочнае мерапрыемства ў Цэнтры карэкцыйна-развіваючага навучання і рэабілітацыі.

– Правядзенне такога мерапрыемства стала ўжо традыцыйным, – расказвае М.Я.Ціцяк, дырэктар цэнтра. – Мы вельмі ўдзячны за аказаную дапамогу ў правядзенні свята раённаму выканаўчаму камітэту, раённай арганізацыі Беларускага таварыства Чырвонага Крыжа, а таксама юным артыстам з аг.Васілішкі. Усе хлопчыкі і дзяўчынкі, якія прыйшлі да нас на свята, атрымалі вялікі зарад станоўчых эмоцый і, канешне ж, салодкія падарункі.

Павіншаваць са святам рабят прыйшлі Л.В.Жылінская, галоўны спецыяліст аддзела адукацыі райвыканкама, В.М.Урсул, старшыня раённай арганізацыі Беларускага таварыства Чырвонага Крыжа і валанцёр гэтай арганізацыі Н.А.Шумік.

Правілы бяспекі ў перыяд летніх канікул яшчэ раз нагадала хлопчыкам і дзяўчынкам С.І.Кірылава, фельчар-валеолаг Шчучынскага занальнага ЦГіЭ.

На свята да дзетак-інвалідаў завіталі любімыя казачныя героі – Мальвіна і Бураціна.Святочны настрой стварылі прыгожыя песні і танцы. З цікавасцю паглядзелі рабяты пастаноўку ўсім вядомай казкі “Калабок” на новы лад.

– Я ўжо не першы раз прымаю ўдзел у такіх мерапрыемствах, – расказвае Ігар Марозік з Васілішак. – Вельмі люблю танцаваць, а таму наведваю танцавальны гурток. Мы часта выступаем на сцэне. Прыемна, што наша выступленне спадабалася рабятам.

– Дзякуючы такім мерапрыемствам, нашы дзеці атрымліваюць магчымасць зносін, – дзеліцца з намі мама 10-гадовага Андрэйкі з в.Ляшчанка. – Мой сын займаецца дома, таму ён заўсёды з жаданнем наведвае мерапрыемствы, якія праводзяцца ў ЦКРНіР. Хочацца пажадаць усім дзецям здароўя, а бацькам - каб яны любілі сваіх дзяцей такімі, якія яны ёсць, і не гублялі веры, надзеі і аптымізму.
Вольга ЦІШКО.