“Міласэрнасць без межаў...”

Пад такім дэвізам прайшоў месячнік Чырвонага Крыжа

Адметнасць сёлетняга месячніка ў тым, што ладзіўся ён у юбілейны год для Беларускага Чырвонага Крыжа. 90-гадовы шлях прайшла гэтая грамадская арганізацыя. Першае ўпамінанне аб дзейнасці Таварыства Чырвонага Крыжа на тэрыторыі Беларусі прыходзіцца на 1866-1867 гады, калі Міністэрства ўнутраных спраў распаўсюдзіла цыркуляр аб стварэнні Таварыства апекавання над параненымі і хворымі воінамі ў ваенны час. А рашэнне аб стварэнні нацыянальнага Таварыства Чырвонага Крыжа і Чырвонага Паўмесяца СССР урад Беларусі прыняў 6 чэрвеня 1921 года.

Беларускі Чырвоны Крыж – грамадская арганізацыя, якая існуе за добраахвотныя ахвяраванні і дзейнічае ў адпаведнасці з асноватворнымі прынцыпамі Міжнароднага руху Чырвонага Крыжа і Чырвонага Паўмесяца, – аказвае дапамогу ахвярам узброеных канфліктаў і катастроф, адзінокім інвалідам і састарэлым, удзельнічае ў арганізацыі дапамогі насельніцтву ў экстрэмальных сітуацыях. З 1995 года Беларускі Чырвоны Крыж – член Міжнароднай Федэрацыі таварыства Чырвонага Крыжа і Чырвонага Паўмесяца.

Дзейнасць арганізацыі праходзіць пад знакам гуманізму, дабравольнасці, справядлівасці. Гэтыя прынцыпы ўзяла за аснову і раённая арганізацыя Беларускага таварыства Чырвонага Крыжа. Якімі справамі і клопатамі жыве яна ў гэтыя дні, мы папрасілі расказаць старшыню раённай арганізацыі БелТЧК Валянціну Мікалаеўну Урсул.

– Завяршыўся месячнік садзеяння Чырвонаму Крыжу. Сёлета яго дэвіз – “Міласэрнасць без межаў...”. Гэта і стала для нас кіраўніцтвам да дзеяння. Актывісты арганізацыі стараліся прыцягнуць увагу кіраўнікоў прадпрыемстваў і арганізацый, прадпрымальнікаў і ўвогуле грамадзян, моладзь да праблем адзінокіх састарэлых людзей, дзяцей-сірот, хворых дзетак, мнагадзетных сем’яў. Ім сёння неабходна дапамога і ўвага. У рамках месячніка сумесна з раённым аддзелам адукацыі, тэрытарыяльным цэнтрам сацыяльнага абслугоўвання насельніцтва мы правялі акцыю “Пачні дапамагаць вясной”, у ходзе якой валанцёрскія атрады школьнікаў і моладзі дапамаглі ветэранам вайны, адзінокім састарэлым людзям, інвалідам навесці парадак у кватэрах і на падворках, на магілах сваякоў.

Дапамогу адзінокім састарэлым жыхарам пастаянна аказвае служба міласэрнасці Чырвонага Крыжа. Медсястра Л.Р. Кавалёва вельмі ўдзячна валанцёрам З.П. Нагоравай, Л.І. Хула, Н.А. Шумік і іншым, якія апякаюць цяжка хворых людзей. Актывісты клуба “Апора”, што дзейнічае на базе раённай арганізацыі БелТЧК, разам з работнікамі службы сацыяльнага абслугоўвання, работнікамі цэнтра карэкцыйна-развіваючага абучэння і рэабілітацыі падрыхтавалі акцыю “Ласкавыя рукі” да Дня абароны дзяцей, падчас якой наведалі дзетак з адхіленнямі ў здароўі і ўручылі ім падарункі. У Дзень сям’і актывісты-чырванакрыжаўцы і работнікі сацыяльнай службы павіншавалі ў радзільным аддзяленні маладых мам і тых жанчын, хто імі хутка стане, уручылі падарункі для нованароджаных.

У выніку гуманітарных акцый “Дапамажы нам дапамагчы іншым” і “Плячо падтрымкі” была аказана дапамога ўразлівым катэгорыям насельніцтва – інвалідам, мнагадзетным сем’ям, дзеткам з адхіленнямі ў здароўі. Адзенне і абутак з гуманітарнага грузу са Швейцарыі і Ісландыі атрымалі 188 сямей. 22 мнагадзетныя сям’і атрымалі 20-кілаграмовыя прадуктовыя пасылкі з рэспубліканскага таварыства Чырвонага Крыжа. Акрамя таго, сродкі асабістай гігіены былі перададзены ў інфекцыйнае аддзяленне райбальніцы для дзяцей з мнагадзетных і нядобранадзейных сем’яў.

Актывісты Чырвонага Крыжа ўдзельнічаюць у падрыхтоўцы юных інспектараў дарожнага руху да раённага агляду, у інфармацыйна-прафілактычных кампаніях. Сумесна з медработнікамі, валанцёрамі ТЦСАН і работнікамі культуры падрыхтавалі мерапрыемствы да Сусветнага дня без тытуню.

Хацелася б выказаць удзячнасць актывістам нашых “пярвічак” на раёне за добрую работу. Менавіта яны падказваюць адрасы людзей, якім вельмі патрэбна дапамога.

Наша арганізацыя існуе за кошт ахвяраванняў. Хочацца звярнуцца да кіраўнікоў прадпрыемстваў і ўстаноў, да ўсіх жыхароў раёна. Не пакідайце без увагі людзей, якія апынуліся ў складаным становішчы. Ваша падтрымка, матэрыяльная і маральная, ім вельмі неабходна. Вашы ахвяраванні пойдуць на добрую справу.
Ала УЛАДЗІМІРАВА.