Добрушский райагросервис выходит из кризиса

У савецкія часы ААТ “Добрушскі райаграсэрвіс” з’яўлялася флагманам вытворчасці раёна. Добрыя ўмовы працы, заробкі прыцягвалі на прадпрыемства лепшых спецыялістаў. Усё скончылася амаль адначасова з развалам Савецкага Саюза. Напрацаваныя дзесяцігоддзямі сувязі і заказы – усё пайшло пад адхон.Cказаць, што сёння прадпрыемства перажывае эканамічны ўзлёт, будзе не зусім дакладна, як і замоўчванне першых станоўчых вынікаў. Людзі ўбачылі нарэшце маленькі прамень святла ў канцы тунэля.

Кіраўніцтва прадпрыемства ўважліва прааналізавала папярэднюю гаспадарчую дзейнасць, вызначыла стратныя месцы, распрацавала стратэгію вытворчасці.

Па словах дырэктара ААТ “Добрушскі райаграсэрвіс” М.М.Маскаленкі, работу пачалі з апарату ўпраўлення. Пасля яго скарачэння прыйшло дванаццаць спецыялістаў (слесары, токары, газаэлектразваршчыкі), прыйшлі пад канкрэтныя заказы і дамовы, якія заключыла прадпрыемства.

У канцы мінулага года Міністэрства сельскай гаспадаркі праз рэспубліканскае аб’яднанне “Белаграсэрвіс” аб’явіла конкурс на лепшыя ўзоры сельгастэхнікі, у якім прыняла ўдзел ААТ “Добрушскі райаграсэрвіс”. Разам са сваімі сумежнікамі (ААТ “Бабруйскаграмаш”, рэспубліканскім навукова-практычным цэнтрам, ААТ “Гомельагракамплект”, ЗАТ “Славянская тэхналогія”) прынялі ўдзел у некаторых выстаўленых лотах і перамаглі.

Атрыманы заказ на выраб кантэйнеравоза садовага К-10 коштам 46 мільёнаў рублёў. Для яго вытворчасці прадпрыемства набывае толькі 20 працэнтаў камплектуючых, астатнія – 80 – вырабляе ва ўласных майстэрнях. Неўзабаве 10 кантэйнеравозаў будуць адпраўлены ў сельгаспрадпрыемствы краіны.

Кіпіць работа вакол глебаапрацоўчага агрэгата АДУ-6АКД. Яго кошт складае 214 мільёнаў рублёў. У час выпрабаванняў агрэгат паказаў высокую якасць апрацоўкі глебы і эканамічнасць у параўнанні з замежнымі аналагамі.

Майстэрні прадпрыемства ачышчаны ад металалому, які неўзабаве будзе здадзены. Электрычныя дугі электразваркі, грукат металу напаўняюць цэхі прадпрыемства індустрыяльнай мелодыяй аднаўлення.

Мікалай Мікалаевіч Маскаленка асцярожна агучвае планы на будучыню, звяртаючы ўвагу на здаровы аптымізм падначаленых. Але лепш за усялякія словы гавораць сухія лічбы вынікаў фінансава-гаспадарчай дзейнасці прадпрыемства.

Згодна з імі, выручка ад рэалізацыі павялічылася ў параўнанні з мінулым годам на 288 мільёнаў рублёў, прыбытак – на 66 мільёнаў. Рэнтабельнасць продажу склала 6,9 мільёна, замест адмоўных 18,5 у мінулым годзе. Чысты прыбытак у першым квартале склаў 69 мільёнаў рублёў замест 21 у мінулым. Але самае галоўнае тое, што сярэдні заробак павялічыўся ў два разы і складае зараз 812 тысяч рублёў. – А гэта значыць, – гаворыць Мікалай Мікалаевіч, – што мы ўзялі правільны курс. Асабіста я, – працягвае кіраўнік, – гляджу ў будучыню прадпрыемства з верай у лепшае.

Леанід ДУБОЎСКІ