Выездные суды стали традиционной практикой на Добрушчине

Гэтыя словы намесніка начальніка аддзялення аховы правапарадку і прафілактыкі Добрушскага РАУС Аляксея Макавея адносіліся да работніка КСУП “Жгунскае”, чыя грамадзянская справа разглядалася ў выязным судзе

Пазбаўлены бацькоўскіх правоў мужчына менш чым за год шэсць разоў быў затрыманы ў стане алкагольнага ап’янення. Ні штрафы, ні адміністрацыйныя арышты на некалькі сутак не падштурхнулі яго на шлях выпраўлення. Нават афіцыйнае папярэджанне засталося для абвінавачваемага пустым гукам.

Між тым, мужчына з’яўляецца абавязанай асобай і павінен вяртаць дзяржаве грошы, затрачаныя на ўтрыманне яго дачкі. Некалькі месяцаў без працы, частыя прагулы на новым рабочым месцы – доўг дасягнуў мільёнаў рублёў.

На першы погляд, сітуацыя тыповая, і выйсце з яе можа быць толькі ў прымусовым лячэнні ў лячэбна-працоўным прафілакторыі. Па словах пракурора раёна Віталія Савенчука, справы з удзелам абавязаных асоб традыцыйна разглядаюцца на выязных судах у вёсках і на прадпрыемствах з удзелам аналагічнага кантынгенту людзей. Такая форма разгляду дае больш значны прафілактычны эфект. У гэты раз пасяджэнне прайшло крыху па іншым плане.

Шчыра кажучы, упершыню прысутнічаў на працэсе, дзе ўсе прысутныя выказваліся ў абарону абвінавачваемага. Падтрымаць свайго калегу прыйшлі работнікі паляводчай брыгады, суседзі, прадстаўнікі адміністрацыі прадпрыемства. З пункту гледжання закона, віна цалкам была даказана, аднак па-чалавечы было шкада працавітага мужчыну, якога суседка ахарактарызавала як “ціхага п’яніцу”.

– Выпівае часта, і гэта адзіная яго праблема, – расказвала жанчына. – У адрозненне ад іншых, сусед ніколі не ўчыняў боек, не лаяўся з суседзямі і знаёмымі, не краў, хутчэй, наадварот – дапамагаў усім адзінокім пажылым на вуліцы.

Добрую характарыстыку падсуднаму дала і брыгадзір паляводчай брыгады. Наяўнасць жа запазычаннасці тлумачыцца проста: заробкі ў гаспадарцы не вельмі высокія. Мужчыне і так застаецца ўсяго 30 працэнтаў зарплаты. Каб неяк пражыць, даводзіцца выконваць розную работу для аднавяскоўцаў. Акрамя таго, у яго захаваліся добрыя адносіны з дачкой, якая рэгулярна наведвае бацьку.

Магчыма так. А сам “ціхі п’яніца” ні слова не сказаў у сваю абарону. Толькі перад вынясеннем рашэння прамовіў: “Заўтра закадзіруюся. Не накіроўвайце ў ЛПП”.

– Па законе абавязаная асоба пасля трох правапарушэнняў можа быць накіравана на прымусовае лячэнне, – пасля пасяджэння патлумачыла прысутным суддзя Марыя Сапронава. – А ў нашым выпадку такіх парушэнняў было цэлых шэсць. Патрэбна памятаць і тое, што за пэўную колькасць прагулаў можна было ўзбуджаць крымінальную справу.

Закон суровы, але ён закон. Так казалі ў старажытнасці, гэтыя словы не страцілі актуальнасці і сёння. Наступныя 12 месяцаў жгунскі палявод правядзе ў спецыялізаванай установе і, магчыма, гэта стане лепшым урокам, чым штрафы і арышты.Сяргей ЧАЙДАК