Инвесторы из Брянска приходят в Добруш

У сярэдзіне 90-х рэспублікі былога Савецкага Саюза толькі-толькі пачалі прыходзіць у сябе пасля перажытага шоку — распаду вялікай краіны. Тады Беларусь і Расія вырашылі спыніць разбуральную інэрцыю ўсеагульнага разладу. 2 красавіка 1996 года прэзідэнты Беларусі і Расіі падпісалі Дагавор “Аб стварэнні Супольнасці Расіі і Беларусі”, а роўна праз год — 2 красавіка 1997 года — быў падпісаны Дагавор “Аб Саюзе Беларусі і Расіі”.

Вось ужо 15 год, нягледзячы на перыядычныя спрэчкі і цяжкасці ў супрацоўніцтве, Беларусь і Расія нястрымна імкнуцца адна да адной і працягваюць ісці па шляху інтэграцыі. Далейшы сумесны план супрацоўніцтва прадугледжвае падтрымку інвестыцыйных праектаў, развіццё вытворчай кааперацыі, пашырэнне рэжыму доступу тавараў.

У рамках пашырэння супрацоўніцтва паміж Гомельскай і Бранскай абласцямі ў райвыканкаме адбылася сустрэча кіраўнікоў фарфоравага завода, папяровай фабрыкі “Герой працы”, “Белагразапчасткі”, “Райсельгастэхнікі”, Добрушскага КБА, КУП “Добрушскі камунальнік”, Добрушскага хлебазавода, райспажыўтаварыства з часова выконваючым абавязкі намесніка губернатара Бранскай вобласці Аляксандрам Сяргеевічам Гаршковым.

— Бранская вобласць не менш зацікаўлена ў супрацоўніцтве, чым Добрушскі раён і ўся Гомельская вобласць, бо наш рэгіён— гэта своеасаблівы плацдарм для выхаду на вялікі расійскі рынак, — адзначыў Аляксандр Сяргеевіч. — На тэрыторыі Добрушскага раёна знаходзіцца шмат цікавых прадпрыемстваў, якія змогуць знайсі сваю нішу на расійскім рынку. І мы, бранцы, гатовы дапамагчы ў арганізацыі фірменнага гандлю ці ў стварэнні сумесных прадпрыемстваў.

Падчас сустрэчы А. С. Гаршкову былі прадстаўлены праекты, якім патрэбна інвестыцыйная падтрымка, распрацаваныя на прадпрыемствах нашага раёна. І ніводная прапанова беларусаў не была пакінута без увагі. “Мы абавязкова разгледзім усе вашы прапановы, — паабяцаў Аляксандр Сяргеевіч, — і паспрабуем дапамагчы”.

Магчыма, у хуткім часе пры настойлівасці дабрушан і падтрымцы бранцаў на расійскім рынку з’явіцца яшчэ больш тавараў з надпісам “Зроблена ў Беларусі”.

Паліна БЫКОЎСКАЯ