В КВНе прінялі ўчастіе школы Добруша

Тэмай сёлетняй гульні КВЗ сярод гарадскіх школьных каманд стала бяспека на дарозе. Здавалася б, як можна з жартамі расказаць аб правілах і знаках дарожнага руху? Аказваецца, калі падысці да справы з усёй адказнасцю і жаданнем стаць першымі, то можна знайсці камізм і ў больш сур’ёзных тэмах. Гэта добра прадэманстравалі каманды гарадскіх школ №2, №3 і №5.

Сваю візітку ў лепшых традыцыях клуба вясёлых і знаходлівых прадставілі вучні школы №2. Кожны іх жарт выклікаў смех і апладысменты ў зале. Мяркуючы па назве каманды “Проста разумныя падлеткі”, у яе ўвайшлі і сапраўды самыя здольныя рабяты, да таго ж, на сцэне сваёй школы яны адчувалі сябе гаспадарамі. Крыху ніжэйшы ўзровень падрыхтоўкі мелі вучні САШ №3, затое каманда пятай школы была на вышыні – добрае музычнае афармленне, касцюмы для кожнай мініяцюры дазволілі ім адразу вырвацца ў лідары.

Да падрыхтоўкі конкурсу штэма (школьнага тэатра эстрадных мініяцюр) кожны з удзельнікаў таксама падышоў па-свойму. Гаспадары сцэны расказалі аб навінах у свеце з дапамогай цікавых дарожных знакаў, якія дэманстраваліся на вялікім экране. Падлеткі школы №5 паказалі павольныя скачкі на конях, а іх сапернікі – рэальныя смешныя сітуацыі на дарозе з удзелам супрацоўнікаў ДАІ. Дарэчы, у час гульні сюжэтаў з удзелам праваахоўнікаў было шмат, аднак ніводны з іх не кідаў цень на супрацоўніка міліцыі.

Найбольш відовішчным стала дамашняе музычнае заданне пад назвай “Засвяціся, дай сабе шанец!”. Выкарыстоўваючы два сэнсы слова “засвяціся”, рабяты і флікер разрэкламавалі, і свае творчыя здольнасці прадэманстравалі. Спявалі практычна ўсе, а юнакі школы № 2 – пад жывы акампанемент гітары. Праўда, школьнікі не вельмі добра працавалі з мікрафонамі, таму і мноства жартаў прайшло міма гледачоў.

Ацэнкі за апошні конкурс ва ўсіх каманд былі аднолькавымі, аднак па суме балаў наперад выйшла каманда САШ №5. На другім месцы з невялікім адрывам – каманда САШ №2.

– Узровень гульні школьнікаў расце з кожным годам, – падзялілася меркаваннямі старшыня журы Людміла Еўтухова. – Адчуваецца, што рабяты сур’ёзна рыхтаваліся. Парадавалі і балельшчыкі, якія загадзя намалявалі плакаты з заклікамі і пастаяна падтрымлівалі свае каманды.

Гульня скончылася, але ў аўтара публікацыі засталося некалькі прэтэнзій да школьнікаў. Лыжкай дзёгцю стала тое, што ніводная з каманд ні разу правільна не назвала службу ДАІ. Рабяты, дзяржаўнай інспекцыі бяспекі дарожнага руху ў Беларусі не існуе!

Сяргей ЧАЙДАК