Лёд на Ипути скоро тронется

Яшчэ ў сярэдзіне сакавіка надвор’е стала па-вясноваму цёплым. Разам з таяннем снегу пачалося і разбурэнне лёду на рэчках і азёрах раёна. Але на гэта не звяртаюць увагі тыя, хто хоча скараціць адлегласць да работы, вучобы, дома і выбірае лядовы шлях. Праўда, такіх смелых з кожным днём становіцца ўсё менш.

аботнікі ратаўнічай станцыі ў гэтыя дні нясуць пільную вахту. Сёлета ім неаднойчы даводзілася знімаць з нетрывалага лёду вучняў гарадской САШ №3, навучэнцаў ПТВ. За мінулы тыдзень такіх экстрэмалаў было восем. Пасля прафілактычнай гутаркі падлеткі ішлі па сваіх справах, толькі ўжо ў абход рэчкі.

Яшчэ адна катэгорыя людзей, якія рызыкуюць жыццём без прычыны, – аматары зімовай рыбалкі. Збіраючыся каля мастоў па дзесяць і больш чалавек на невялікім кавалачку лёду ў пошуках рыбы, яны і не задумваюцца аб небяспецы. Трываласць лёду большасць рыбакоў вызначае па яго таўшчыні, аднак на самой справе яна залежыць ад тэмпературы надвор’я, якая была напярэдадні, наяўнасці цячэння і г. д.

Сёлета падлёдны лоў забаронены ў сувязі з раннім нерастам рыбы, але некаторыя дабрушане працягваюць выходзіць на рэчку па-за рысай горада. Яны рызыкуюць не толькі атрымаць штраф у некалькі дзясяткаў базавых велічынь за парушэнне правіл рыбалоўства, але і стаць ахвярай сцюдзёнай вады.

Трывогу выклікаюць і паводзіны дзяцей. Як правіла, большасць няшчасных выпадкаў вясной на рэчцы адбываецца менавіта з удзелам непаўнагадовых. Можна часта бачыць, як падлеткі скачуць з ільдзіны на льдзіну і ўсё больш аддаляюцца ад берага. Такая гульня заканчваецца трагедыяй.

Работнікі АСВОДа наведалі практычна ўсе школы і дзіцячыя садкі горада, дзе правялі лекцыі на тэму бяспечных паводзін на вадзе. Аднак гэтага мала. Да прафілактыкі павінны падключыцца бацькі, выхавацелі, настаўнікі, вучні старэйшых класаў, грамадскія аб’яднанні. Калі за справу ўзяцца ўсім разам, то і вясну можна будзе сустракаць у добрым настроі.

Аляксей БАГДАНАЎ,