В котельной Добруша монтируется когнитивная установка

У аператара газавай кацельні Людмілы Аднавочка (на здымку) ў хуткім часе прыбавіцца работы. Сёння жанчына кантралюе паказчыкі аднаго катла, сочыць за аўтаматыкай і самастойна прымае рашэнні па недапушчэнні аварыйнай сітуацыі. У наступным ацяпляльным сезоне вадагрэйных катлоў будзе намнога больш, з’явіцца і газавая кагнітыўная ўстаноўка.

Рэканструкцыя кацельні “Меліяратар” пачалася яшчэ зімой. Работы не абмяжоўваюцца заменай катлоў. Перапланіроўцы і рамонту падлягае ўвесь будынак, спраектаваны ў 1967 годзе. Адзін са старых катлоў ужо дэманціраваны. На яго месцы размясціліся два новыя, замежнай вытворчасці. Часткова рэканструявана і газаразмеркавальная сістэма. За лета патрэбна паспець дэманціраваць апошні вадагрэйны агрэгат, падключыць усё новае абсталяванне ў адну сістэму, закончыць рамонт будынка.

– Чакаем толькі завяршэння ацяпляльнага сезона, – расказаў майстар участка кацельняў КУП “Добрушскі камунальнік” Аляксандр Шаўцоў. – Жыхарам мікрараёна давядзецца крыху пацярпець: на некаторы час будзе адключана гарачае водазабеспячэнне, затое пасля ўстаноўкі ўсяго абсталявання кацельня будзе здольна абслугоўваць усе будынкі мікрараёна, у тым ліку і тыя, якія толькі плануецца ўзводзіць.

Праект, праўда, нятанны. Лік ідзе на мільёны долараў, затраты фінансуе Сусветны банк. Што Добруш атрымае ад яго рэалізацыі? Перш за ўсё, эканомію электраэнергіі і спажываемага газу, што ў сучасных умовах становіцца першачарговай задачай. Навінкай стала і выкарыстанне кагнітыўнай устаноўкі. Цеплавой энергіі, якая выдзяляецца пры ахалоджванні 16-цыліндравага газавага рухавіка, і выхлапных газаў ад яго, хопіць на падагрэў вады для ўсяго мікрараёна. Але гэта не асноўная мэта. Устаноўка будзе выпрацоўваць электрычнасць. Яе разліковая магутнасць – адзін мегаВат.

– Невялікую частку электраэнергіі будзе спажываць сама кацельня, а астатняя пойдзе на патрэбы горада, – расказаў Аляксандр Шаўцоў. – Такі праект – новы не толькі для Добруша, але і для ўсёй вобласці. Адметна, што абсталяванне пастаўляюць вядомыя замежныя фірмы. Рухавік, напрыклад, зроблены ў ЗША, а ўстаноўка – у Чэхіі. Якасныя і надзейныя і астатнія вузлы сістэмы цеплазабеспячэння. Старая, яшчэ савецкай вытворчасці, запорная арматура значна большая і цяжэйшая ў выкарыстанні, чым сучасная. Гэты праект дасць кацельні новае жыццё і дазволіць стаць адной з самых перадавых і аснашчаных на Гомельшчыне.

Сяргей ЧАЙДАК