В Добруше закрывается на ремонт первая школа

З 25 сакавіка гарадская САШ №1 зачыніць свае дзверы на рамонт, каб потым іх адчыніць адноўленай і мадэрнізаванай, каб харчаванне школьнікаў адбывалася ў светлай сталоўцы, каб настаўнікі сустрэлі вучняў ва ўтульных класах. Прыгажосць, як кажуць, патрабуе ахвяр, але нязручнасці давядзецца цярпець не доўга: ужо з 1 верасня 2012 года вучні будуць радавацца рэканструяванай школе, не пашанцуе толькі выпускнікам.

На мінулым тыдні адбыўся сход бацькоў і прадстаўнікоў райвыканкама па арганізацыі вучэбнага працэсу для навучэнцаў САШ №1 г.Добруша. Пагутарыць з бацькамі і адказаць на іх пытанні прыйшлі намеснікі старшыні райвыканкама Р.П. Козыраў і С.В. Пятроўскі, старшыня раённага Савета дэпутатаў А.М. Барсякоў, начальнік аддзела адукацыі І.М. Шкаруба, намеснік начальніка аддзела адукацыі А.Ф. Раздуева, галоўны санітарны ўрач раёна У. В. Маркевіч.

Пытанні былі розныя. Хваляваў бацькоў лёс выпускнога баля, дарэчы, для яго правядзення будзе прадастаўлена зала кінатэатра “Усход”. Бацькі даведаліся, што адміністрацыя навучальнай установы будзе знаходзіцца ў гарадской САШ №5, а намеснік дырэктара пачатковай школы будзе працаваць на дзве ўстановы – гімназію і САШ №2. Бацькамі выказваліся прапановы вазіць дзяцей на заняткі ў Крупецкую школу.

– Гэта тэма пачала абмяркоўвацца на розных пасяджэннях яшчэ ў снежні, – паведаміла начальнік аддзела адукацыі райвыканкама І.М. Шкаруба. – Шмат спецыялістаў пабывала на месцах. Разглядаліся розныя варыянты. У выніку размеркаванне дзяцей па прыведзенай ніжэй схеме дазваляе правільна і аптымальна арганізаваць навучальны працэс, сон і харчаванне. Абмяркоўваецца пытанне аб тым, каб пусціць тры аўтобусы гарадскога маршруту ў гадзіну для вырашэння праблемы праезду дзяцей да САШ №5. На пачатак новага навучальнага года ўзнікнуць іншыя варыянты арганізацыі заняткаў, аб чым бацькі будуць дадаткова праінфармаваны ў жніўні на пашыраным бацькоўскім сходзе.