Базу для предприятия можно найти и в районе

Нерухомасць і зямля ў малых гарадах і вёсках краіны пасля ўвядзення падатковых ільгот для развіцця бізнесу ў рэгіёнах пачалі карыстацца павышаным попытам. Здараецца, што будынак, выстаўлены на аўкцыён з пачатковай цаной у адну базавую велічыню, у выніку прадаецца за мільёны рублёў. Акрамя даходу ў бюджэт, такі механізм уцягнення будынкаў у гаспадарчы абарот мае і яшчэ адзін станоўчы эфект – у раёнах з’яўляюцца новыя прадпрыемствы, а гэта – дадатковыя рабочыя месцы, падаткі.-Кожны з інвестараў, якія звяртаюцца ў райвыканкам па дапамогу, найперш просяць знайсці ім памяшканне для размяшчэння вытворчасці, – расказвае начальнік аддзела эканомікі райвыканкама Генадзь Мальцаў. – Пералік збудаванняў, якія выкарыстоўваюцца неэфектыўна, даволі вялікі, і прапанаваць камерсантам ёсць што. Аднак, яшчэ большая колькасць такіх будынкаў проста не ўлічана, не мае рэгістрацыйных дакументаў, і ўладальнікі адносяцца да гэтага абыякава: маўляў, стаяла і стаяць будзе.

Днямі пытанне выканання заканадаўства па распараджэнні маёмасцю камунальнай уласнасці было разгледжана на пасяджэнні райвыканкама. Адзначаны як пазітыўныя зрухі ў гэтым накірунку, так і негатыўныя факты.

На першы погляд, усім збудаванням знайшлося прымяненне. Так, за мінулы год на аўкцыёнах было прададзена 8 аб’ектаў, яшчэ 14 – закансервавана, 28 – спісана і знесена, адно памяшканне здадзена ў арэнду, два – рэканструявана і яшчэ адно – перапрафіліравана. У час інвентарызацыі дзяржаўнай маёмасці, якая выкарыстоўваецца неэфектыўна, было выяўлена яшчэ 38 аб’ектаў камунальнай маёмасці.

Між тым, некаторыя прадпрыемствы правялі інвентарызацыю фармальна. Аб гэтым сведчаць наяўнасць няўлічаных аб’ектаў, адсутнасць на будынках інвентарных нумараў. Для таго, каб прывабіць пакупнікоў да аб’ектаў, якія плануецца прадаць на аўкцыёнах, было вырашана размясціць на іх інфармацыю аб уладальніках і кантактныя тэлефоны, аднак гэтае даручэнне райвыканкама не выканана па сённяшні дзень.

– Каб прадаць памяшканне, патрэбна спачатку аформіць на яго ўсе неабходныя дакументы, – патлумачыў Генадзь Мальцаў. – Згодна з графікам за 2009–2010 гады патрэбна было зарэгістраваць 84 аб’екты нерухомасці, але на самой справе рэгістрацыю прайшоў 21 аб’ект. Такія адносіны да рашэнняў улады недапушчальныя. Віноўныя будуць пакараны.

На бягучы год запланаваны продаж 8 аб’ектаў, прычым 5 з іх будуць мець пачатковую цану ў адну базавую велічыню. Два будынкі будуць перапрафіліраваны, пяць – закансерваваны, тры – здадзены ў арэнду. 18 збудаванняў падлягаюць зносу.

Як бачна, выбіраць ёсць з чаго. На плошчах любого з васьмі будынкаў у будучым можа размясціцца новае прадпрыемства. Усё, што патрэбна, – давесці інфармацыю аб іх да патэнцыйных інвестараў, а больш падрабязна аб стане і месцах знаходжання аб’ектаў, умовах іх продажу можна даведацца ў аддзеле эканомікі райвыканкама.