Первые десятки тонн нового урожая доставлены на Поставское хлебоприёмное предприятие

дырэктар філіяла “Пастаўскае хлебапрыёмнае прадпрыемства” М. В. Гінько ўручае каравай вадзіцелю Аляксандру Піскуновічу.

Да выканання дзяржаўнага заказу па продажы харчовага збожжа ў 2013 годзе прыступі­ла адкрытае акцыянернае таварыства “Кураполле-агра”. Гэта ганаровая місія выпала вадзіцелю Аляксандру Піскуновічу і галоўнаму аграному гаспадаркі Сяргею Астапчуку. З пачаткам жніва і продажу збожжа дзяржаве іх павіншаваў першы намеснік старшыні райвыканкама, начальнік упраўлення сельскай гаспадаркі і харчавання Антон Чарвінскі, а дырэктар філіяла “Хлеба­прыемнае прадпрыемства” Міхаіл Гінько ўручыў Аляксандру Піскуновічу хлебны каравай.

Такая ўвага, вядома, кранула вадзіцеля. Па стане здароўя Аляксандр толькі ў мінулым годзе не змог працаваць на аўтамашыне, а ва ўсе папярэднія гады на сваім МАЗе з прычэпам перавозіў ад камбайнаў больш чым па тысячы тон збажыны. Разлічвае, што і сёлета будзе не менш. Нягледзячы на засушлівае лета, азімыя цяпер даюць на круг амаль па 30 цэнтнераў. Валавы намалот зерневых і зернебабовых павінен скласці больш за 5000 тон. А гэта азначае, што вадзіцелі будуць пастаянна заняты работай. Не падводзіла б толькі надвор’е.

У лік дзяржзаказу гаспадаркі Пастаўшчыны павінны паставіць сёлета на хлебапрадпрыемства 8500 тон харчовага збожжа. Першая партыя азімай пшаніцы з Кураполля аднесена да трэцяга класа і без дадатковых дапрацовак адразу трапіла ў засекі. Такой збажыне на прадпрыемстве заўсёды рады. Усё гатова і для таго, каб весці яе дапрацоўку на месцы, бо магутнасці сушыльных гаспадарак у шэрагу сельгасарганізацый абмежаваныя.

Тэкст і фота Пятра КУРЫЛОВІЧА.