Блестящий финиш сезона

“Белшына” (Бабруйск) — “ПМЦ-Паставы” — 0:4

Два заключныя матчы нацыянальнага першынства пастаўчане на мінулым тыдні правялі на Магілёўшчыне. Спачатку была важнейшая перанесеная сустрэча з магілёўскім “Дняпром”. Складвалася яна няпроста, бо нашы прайгравалі. Але ў складанай сітуацыі каманда ПМЦ не разгубілася, а адным з герояў зноў стаў нападаючы юнацкай зборнай Беларусі Ілья Кухарчык.

Варатару магіляўчан тройчы прыйшлося вымаць мяч з сеткі пасля яго прыгожых удараў. Адзін з галоў Ілья забіў здалёк, а ў канцоўцы пры ліку 3:3 мог прынесці перамогу, але прабіў не зусім дакладна і трапіў у штангу. І ўсё ж нават адно набранае ачко датэрмінова вывела пастаўчан у прызёры нацыянальнага першынства. Адабраць сярэбраныя медалі ў каманды ПМЦ маглі толькі рэзервісты славутага БАТЭ (Барысаў), якія ў апошнім туры сапернічалі з мінскімі дынамаўцамі.

У Бабруйску на натуральным газоне пастаўчанам гулялася прасцей псіхалагічна і фізічна. Нават пасля таго, як ужо на 19-ай хвіліне яны нечакана засталіся ў меншасці пасля выдалення за грубы фол свайго апорнага паўабаронцы Івана Бяльчонка, мабілізаваліся і на класе перайгралі бабруйчан. З натхненнем правёў сустрэчу дырыжор каманднай гульні Аляксандр Александровіч, які вызначыўся тройчы. Яшчэ адзін пераможны гол запісаў на свой рахунак нападаючы Павел Ясінскі, які вельмі моцна правёў два заключныя матчы сезона. У выніку дваіх нашых хлопцаў запрасілі на прагляд у дубліруючы склад “Белшыны”.

Пасля чарговай буйной перамогі пастаўчанам засталося толькі чакаць выніку матча БАТЭ. На радасць усім, барысаўчане прайгралі мінчанам з лікам 0:1, што прынесла футбалістам “ПМЦ-Паставы” сярэбраныя медалі. Для каманды з невялікага райцэнтра гэта, безумоўна, выдатная і заслужаная перамога, дасягнутая карпатлівай працай пад кіраўніцтвам таленавітых трэнераў С. М. Ясінскага і Я. Ю. Чарнухіна.

Другі круг першынства пастаўчане правялі на адным дыханні, прайгралі толькі аднойчы, тры матчы згулялі ўнічыю, а астатнія 10 выйгралі. Наша каманда — лідар чэмпіянату Беларусі па забітых мячах (роўна 90). Нападаючы Ілья Кухарчык стаў лепшым бамбардзірам першынства і правёў 28 галоў. Яго таварышы Аляксандр Александровіч і Павел Ясінскі ўвайшлі ў пяцёрку лепшых снайпераў. Слоў падзякі заслугоўваюць нашы варатары Андрэй Чашун, Мікіта Рабцэвіч, ігракі абарончай лініі, капітан каманды Аляксандр Ванда, Віталь Дубін, Уладзімір Камісарчук, Яўген Сакалоў, Вадзім Танана, Іван Лузан, Павел Пучынскі.

На высокім узроўні гулялі ігракі сярэдняй лініі і групы атакі Глеб Жалезнікоў, Іван Бяльчонак, Ігар Павініч, Андрэй Вілейта, Руслан Хаткевіч, Уладзіслаў Худой. У выніку каманда футбольнай акадэміі ПМЦ стала адной з вядучых у Беларусі ва ўзросце да 17 гадоў. На пераможнай ноце завяршыла сезон каманда ПМЦ-2, якая перамагла ў Бабруйску з лікам 2:1 і фінішавала на выніковым 12-м месцы. Але трэба ўлічыць, што яна гуляла сярод старэйшых на год сапернікаў.

Праз месяц пачнецца новы нацыянальны чэмпіянат, у якім пастаўчане зноў згуляюць дзвюма камандамі. Адпачынак у нашых футбалістаў будзе кароткім, а ўжо з 24 ліпеня яны пачнуць падрыхтоўку да новага сезона, згуляюць кантрольныя матчы ў Смаленску, Вільнюсе і Санкт-Пецярбургу. А зараз віншуем каманду ПМЦ з заваяваннем сярэбраных медалёў і жадаем не спыняцца на дасягнутым.

Уладзімір ШЫК.