Могут не только копать

навучэнцы групы №204 — члены студэнцкага будаўнічага атрада.

Адной з галоўных будоўляў 2013 года на Пастаўшчыне з’яўляецца малочнатаварная ферма “Коўзаны” адкрытага акцыянернага таварыства “Навасёлкі-Лучай”. З-за адсутнасці фінансавання работы на ёй прыпыняліся. Сёлета яны вядуцца больш актыўна. Ды інакш і не можа быць, бо першую чаргу аб’екта павінны здаць у эксплуатацыю ў гэтым годзе.

 Генеральным падрадчыкам з’яўляецца вядучая будаўнічая арганізацыя “Полацксельбуда” — АБП “Рассвет Пастаўскі”. Непасрэдна работамі на месцы кіруе майстар Андрэй Драбовіч. Пры сустрэчы ён расказаў, што аб’ект пакуль гатовы на 65 працэнтаў.  Разам з рассветаўцамі працуюць субпадрадчыкі з філіяла “Пастаўскае ДРБУ-32”, прадпрыемства меліярацыйных сістэм, мантажнікі з Полацка, а таксама навучэнцы прафтэхкаледжа. Справамі апошніх мы і пацікавіліся.

З 1 ліпеня адзінаццаць другакурснікаў 204 групы аб’ядналіся ў студэнцкі будаўнічы атрад. На працягу першага тыдня працавалі ў сталярным цэху, 8 ліпеня  іх накіравалі на важнейшы аб’ект года і ўручылі  новыя рыдлёўкі. Юнакам прадстаяла капаць траншэю пад ліўнёўку. Хаця гэта і не выклікала асаблівага энтузіязму, справа рухаецца. Дарэчы, траншэю капаюць і некалькі дарослых.

— Работа нялёгкая, — адзначыў майстар групы Дзмітрый Мажэйка. —  Гліністая глеба паддаецца не так проста, але рабяты не скардзяцца. Вось і сёння ўвішна працуюць Аляксандр Фясенка, Аляксандр Пятроў, Раман Танана, Арцём Мухін, Валерый Яначкін, Дзяніс Мукель і Арцём Язёнак. Прызвычаіліся і да распарадку рабочага дня, які пачынаецца ў 7.30. Усе стараюцца, працуюць без заўваг.

— Усяго ў прафтэхкале­джы гэтым летам былі створаны тры студэнцкія будаўнічыя атрады, — расказала першы сакратар райкама ГА “БРСМ” Іна Каралёва. — Адзін ужо адпрацаваў, два завяршаюць работу на гэтым тыдні. Яшчэ адзін у колькасці 30 чалавек займаецца праполкай у пітомніку лясгаса. У яго ў асноўным увайшлі школьнікі горада. Зараз дамаўляемся з кіраў­нікамі шэрага сельгаспрад­прыемстваў аб стварэнні атрадаў па дапрацоўцы збожжа, выкананні іншых работ, звязаных са жнівом. Добра папрацавалі вучні па  падрыхтоўцы школ да новага навучальнага года. Многія старшакласнікі часова сталі работнікамі іншых працоўных калектываў.

Лета яшчэ ў разгары.  А гэта значыць, што хопіць часу і адпачыць, і аказаць дапамогу старэйшым.

Тэкст і фота Пятра КУРЫЛОВІЧА.