Вступая во взрослую жизнь. В Поставском профтехколледже прошёл выпускной (+фото)

Напрыканцы чэрвеня ў Пастаўскім прафтэхкаледжы, як і ва ўсе папярэднія гады, адбыліся ўручэнне дыпломаў і выпускны баль. Для 214 маладых спецыялістаў масавых прафесій гэта стала сапраўднай па­дзеяй, трамплінам у дарослае жыццё. Дырэкцыя і педагагічны калектыў зрабілі ўсё для таго, каб развітанне з навучальнай установай атрымалася яркім, запамінальным. Усхваляванымі і ўрачыстымі выглядалі выпускнікі, гучалі музыка і песні, успаміны і наказы-развітанні, у клубе панаваў святочны настрой.

— Адны навучэнцы ішлі да выпускнога вечара тры гады, іншыя — усяго год, — адзначыў дырэктар прафтэхкаледжа М. М. Лысёнак. — Мы былі адной вялікай сям’ёй і захавалі яе да самага выпуску. Упэўнены, што большасць юнакоў і дзяўчат ажыццявілі свае надзеі і жаданні, атрымалі спецыяльнасці, якія спатрэбяцца ў жыцці, дадуць магчымасць павышаць свой прафесійны ўзровень на базе сярэдняй спецыяльнай і вышэйшай адукацыі. Няхай жа вам спадарожнічае поспех ва ўсіх справах!

Прафтэхкаледж сельскагаспадарчай вытворчасці — гэта ўстанова, дзе 40 працэнтаў вучэбнага часу адводзіцца на вытворчае навучанне і практыку. Падчас іх праходжання будучыя спецыялісты масавых прафесій не толькі замацоўваюць тэарэтычныя веды, але і маюць магчымасць праявіць сябе, паказаць, на што здольныя. Менавіта такімі зарэкамендавалі сябе Аляксандр Даўгалюк і Уладзіслаў Ожаль, якія атрымалі кваліфікацыі слесара, трактарыста-машыніста і вадзіцеля катэгорыі “С”. Выдатна папрацаваўшы ў  вучэбнай гаспадарцы, на добраўпарадкаванні, яны разам з дыпломамі атрымалі і сваю першую грашовую прэмію.

Падзяку заслужыў выпускнік Ігар Маслоўскі. Пра тое, як годна ён праходзіў вытворчую практыку ў сельскагаспадарчым аддзяленні АБП “Рассвет Пастаўскі”, расказаў у пісьме дырэктар прадпрыемства А. І. Малец. Ігар нараўне з дарослымі выконваў любую работу, праявіў сябе падрыхтаваным спецыялістам, сапраўдным прафесіяналам. Заслужыць такую характарыстыку многае значыць.

Аб высокім узроўні падрыхтоўкі іншых выпускнікоў сведчаць граматы дырэкцыі каледжа, якія былі ўручаны за выдатную і добрую вучобу Марыне Баран, Маргарыце і Юліі Нікіціным, Алене Юркайць, Алене Янушкевіч, Алене Протас, Алене Цыцынай, Яўгенію Радзевічу, Вікторыі Жышкевіч, Анастасіі Паповай, Віталію Ермашонку і Уладзіміру Курда.

Гады вучобы ў каледжы будуць ўспамінацца і як лепшы час юнацтва, гарэзлівых мар, вясёлых дыскатэк, шматлікіх канцэртаў, спартыўных спаборніцтваў, іншых пазнавальных і забаўляльных мерапрыемстваў. У каледжы ўсебакова змаглі раскрыць свае творчыя  здольнасці і таленты дзясяткі навучэнцаў. Найбольш актыўныя ў грамадскім і спартыўным жыцці — а гэта амаль трыццаць чалавек — таксама атрымалі граматы і падзякі дырэкцыі навучальнай установы.

Шчыра радаваліся за выпускнікоў і  бацькі. Многія з іх на працягу вучобы падтрымлівалі цесныя кантакты з педагогамі, майстрамі, куратарамі, разам вырашалі розныя пытанні. Разам яны былі і на выпускным балі. Вынік сумеснай работы прынёс добры плён. Дзеці атрымалі спецыяльнасці, падраслі, узмужнелі, сталі гонарам для бацькоў. Апошнім — а іх было больш за пяцьдзясят — дырэктар каледжа ўручыў падзячныя пісьмы.

Сёлетняя ўрачыстасць з нагоды ўручэння дыпломаў для інжынерна-педагагічнага калектыву была асаблівай. Адбыўся першы выпуск навучэнцаў па спецыяльнасці  “Тэхнічная эксплуатацыя аўтамабіляў”. 24 выпускнікі атрымалі дыпломы аб сярэдняй спецыяльнай адукацыі  з прысваеннем кваліфікацыі “тэхнік-механік”. Такія спецыялісты запатрабаваны, таму іх падрыхтоўку будуць прадаўжаць не толькі на дзённай, але і на завочнай формах навучання.

 Тэкст і фота Пятра КУРЫЛОВІЧА.