Лидер — Валерий Лещик

21 чэрвеня на аб’ектах Груздаўскага і Пастаўскага лясніцтваў прайшлі ўнутрылясгасаўскія спаборніцтвы вальшчыкаў лесу “Лесаруб-2013”. У іх  прынялі ўдзел прадстаўнікі дзевяці лясніцтваў і майстарскага  лесанарыхтоўчага ўчастка лясгаса.

Спаборніцтвы з’яўляюцца традыцыйнымі і праводзяцца кожны год. У праграму ў інды­відуальным заліку ўваходзі­ла пяць практыкаванняў: валка лесу, мантаж цэпа, дакладнае распілоўванне, распілоўванне камбінаваным рэзам, абрэзка сукоў. Падыход да ацэнкі  работы быў вельмі строгі і патрабавальны. Разам з баламі за выкананае практыкаванне за дапушчаныя парушэнні налічваліся і штрафныя ачкі. Пазбегнуць іх нікому не ўдалося.

Самым паспяховым было выступленне вальшчыка лесанарыхтоўчага ўчастка Валерыя Лешчыка. З пяці намінацый ён перамог у чатырох і толькі ў адной быў другім і прызнаны пераможцам спаборніцтваў. Дарэчы, некалькі гадоў назад Валерый быў пераможцам сярод маладых лесарубаў вобласці. Другое і трэцяе месцы ў індывідуальным заліку занялі адпаведна Ігар Якубоўскі (Ваўкоўскае лясніцтва) і Юрый Альфер (майстарскі ўчастак).

Добрых слоў заслугоўвае Аляксандр Богуш з Камайскага лясніцтва, які  набраў найбольшую колькасць ачкоў у дакладным распілоўванні. У асобных практыкаваннях спаборніцтваў прызавыя месцы  занялі таксама Валерый Казлоў (Камайскае лясніцтва), Павел Янцэвіч, Аляксандр Шчарбакоў (Варапаеўскае лясніцтва), Якаў Лутохін (майстарскі ўчастак).

У асабістым заліку сярод ­юніёраў пераможцам стаў Аляксандр Баран з Лынтупскага лясніцтва.

Цікава праходзіў конкурс “Эстафета”, у якім удзельнічалі ўсе каманды (па два чалавекі ў кожнай). Лепш за іншых з заданнямі справіліся камайцы і занялі першае месца. Другі і трэці вынік у эстафеце паказалі лесарубы майстарскага ўчастка і Варапаеўскага лясніцтва.

У агульным заліку перамагла каманда майстарскага лесанарыхтоўчага ўчастка (майстар — Юрый Навумец), другое месца заняла каманда Ваўкоўскага лясніцтва (ляснічы — Аляксандр Далжонак), трэцяе —  Варапаеўскага (ляснічы — Анатолій Сапрончык).

Пераможцы і прызёры ў камандным і асабістым заліках узнагароджаны граматамі і грашовымі прэміямі. Варта адзначыць, што  матэрыяльнае заахвочванне дастойнае. Напрыклад, агульная сума прэмій пераможцы спаборніцтваў Валерыя Лешчыка склала 5 мільёнаў 400 тысяч рублёў.

 Тэкст і фота Пятра КУРЫЛОВІЧА.