Закон против «войны на дорогах»

Адразу ў двух чытаннях прынялі дэпутаты Палаты прадстаўнікоў Нацыянальнага сходу Рэспублікі Беларусь законапраект, які прадугледжвае канфіскацыю аўтамабіля, за рулём якога знаходзіцца п’яны кіроўца.

За апошнія 10 гадоў у Беларусі адбылося каля 70 тысяч дарожна-транспартных здарэнняў, у якіх атрымалі раненні больш за 73 тысячы чалавек і загінулі 15 тысяч. Генеральны пракурор Рэспублікі Беларусь Аляксандр Канюк параўнаў апошнюю лічбу з афіцыйнымі данымі па стратах СССР у Афганістане падчас знаходжання там кантынгенту савецкіх войскаў. За 10 гадоў узброенага супрацьстаяння ў  Афганістане таксама загінула каля 15 тысяч савецкіх грамадзян.

Адказнасць п’яных за рулём у нашай краіне ўвесь час павышаецца. У 2007 годзе быў уве­дзены крымінальны артыкул за паўторнае на працягу года кіраванне аўтамабілем у стане ап’янення. Нягледзячы на гэта, колькасць такіх парушэнняў расце: у 2011 годзе да крымінальнай адказнасці было прыцягнута больш за 4,6 тысячы кіроўцаў. За два папярэднія гады нецвярозымі кіроўцамі было здзейснена 2 тысячы аварый, па іх віне загінула больш за 407 чалавек, паранена каля 2 тысяч, у тым ліку 72 дзіцяці.

3 мэтай павысіць абарону грамадзян на дарогах Генеральная пракуратура распрацавала законапраект, які прадугледжвае павелічэнне памеру штрафаў за кіраванне ў нецвярозым стане ад 50 да 100 базавых велічынь (сёння гэта — ад 5 да 10 мільёнаў рублёў). Акрамя таго, пры здзяйсненні аварыі па віне п’янага кіроўцы, у выніку якой пацярпелі людзі, крымінальную адказнасць прапануецца зрабіць больш жорсткай і толькі ў выглядзе пазбаўлення волі.

Законапраект прапануе  канфіскацыю транспартнага сродку незалежна ад таго, у чыёй уласнасці ён знаходзіцца, за выключэннем выпадкаў угону, крадзяжу, самаўпраўства і падобных супрацьпраўных дзеянняў.

Асаблівую ўвагу аўтары законапраекта звяртаюць на тое, што канфіскацыя будзе прымяняцца толькі тады, калі кіроўцы не зрабілі адпаведных высноў пасля першага, адміністрацыйнага, пакарання і ў другі раз на працягу года селі за руль у нецвярозым стане.

(«Звязда» за 20 чэрвеня 2013 года.)