Выслушать и помочь

Кожны раз, прысутнічаючы на “прамой тэлефоннай лініі”, якую праводзіць старшыня райвыканкама, пераконваюся, што такая форма работы мясцовай улады дае выдатную магчымасць любому жыхару раёна выйсці на прамы дыялог з кіраўніком раёна, выказаць просьбы, меркаванні, вырашыць тое ці іншае пытанне. І гэтым скарыстоўваецца нямала грамадзян.

На “прамую лінію”, што адбылася напрыканцы мінулага месяца, да Віктара Сяргеевіча Гутарава звярнулася 11 чалавек. Адны — з пытаннямі, якія датычылі толькі іх саміх, другія — грамадскасці. Напрыклад, пастаўчанка Г. Д. Багуслаў завастрыла ўвагу на праблеме бяспекі руху транспарту ў мікрараёне вуліцы Юбілейнай. У прыватнасці, гаварыла пра тое, што вельмі вузкая праезная частка дарогі паміж домам №7 і дзіцячым садком “Крынічка”. Размінаючыся, машыны іншы раз заязджаюць ажно на тратуар. З-за гэтага недалёка і да бяды, тым больш што інтэнсіўнасць руху ў мікрараёне ўсё ўзрастае. Заяўніца атрымала адказ, што да 30 ліпеня УП ЖКГ будуць выкананы работы па расшырэнні праезнай часткі дарогі.

У А. С. Чарэнкі, які жыве ў мікрараёне пятага гарадка, таксама клопат пра бяспеку руху. “Чаму праз гарадок праходзіць грузавы транспарт і чаму некаторыя вадзіцелі легкавушак перавышаюць скорасць руху?” — задаваў чалавек пытанне. А таксама прасіў правесці ямачны рамонт пляцоўкі каля дома №14 па вуліцы Касманаўтаў.

Па даручэнні старшыні райвыканкама дзяржаўтаінспекцыя правяла ў названым мікрараёне маніторынг захоўвання вадзіцелямі правілаў дарожнага руху (тут даўно ўстаноўлены знакі аб забароне руху грузавога транспарту і абмежаванні скорасці да 40 кіламетраў у га­дзіну). Складзены пратаколы на парушальнікаў, узмоцнены кантроль за вадзіцелямі.

У Я. Р. Якубовіч з вёскі Рагонішкі Лынтупскага сельсавета пытанне было таксама не асабістае — аб адсутнасці вулічнага асвятлення. Але ці патрэбна яно цяпер, калі зусім кароткія ночы? Да таго ж, неабходна ўлічваць, што электраэнергія намнога падаражэла, і з-за абмежаванасці фінансавання даво­дзіцца яе эканоміць. У сувязі з гэтым вулічнае асвятленне ў сельскай мясцовасці на летні перыяд адключаецца. Пра што і патлумачана заяўніцы.

Жыхарка вёскі Стары Двор А. І. Цярлюк ад імя жыхароў вуліцы Азёрнай звярнулася з просьбай вырашыць пытанне водазабеспячэння. Водаправод працяглы час не дзейнічае, гаспадарка завозіць ваду ў кало­дзеж. Такое становішча не задавальняе людзей. Зараз СП “Дунілаві­чы-агра”, якое з’яўляецца ўласнікам водаправода, заключыла дагавор з УП ЖКГ на яго рамонт (выяўлены тры прабоіны), аднак ён яшчэ не зроблены.

Астатнія пытанні, якія паступілі на “прамую лінію”, насілі прыватны характар. Усе заяўнікі атрымалі адказы.

Фаіна КАСАТКІНА.