В будущее — с памятью о прошлом (+фото)

Набліжаецца 22 чэрвеня — дата жалобы і памяці пра ахвяр Вялікай Айчыннай вайны. Менавіта ў гэты дзень пагранічнікі Брэсцкай крэпасці прынялі першыя ўдары магутнага ворага, першымі загінулі ў імя будучай Перамогі.

Подзвігі беларускіх ахоўнікаў мяжы назаўсёды ўнесены ў летапіс нашай краіны. І сёння мы не перастаём захапляцца іх гераізмам, мужнасцю, ахвярнасцю. Пра гэта сведчыць і мітынг, які адбыўся ў Лынтупах 12 чэрвеня з нагоды дзесяцігоддзя прысваення мясцовай пагранічнай заставе імя Героя Савецкага Саюза Сямёна Селіверставіча Пустэльнікава.

Удзел у мерапрыемстве  прынялі ваеннаслужачыя, прадстаўнікі мясцовай і раённай улад, працоўных калектываў, школьнікі. Пачалося яно з вялікай для пагранічнікаў урачыстасці — пад гукі ваеннага духавога аркестра на пляц унеслі Баявы сцяг часці Смаргонскай пагранічнай групы.

— Вам выпаў вялікі гонар прымаць у сценах сваёй заставы гэты сцяг, — звярнуўся да ваеннаслужачых начальнік упраўлення ідэала­гічнай работы і кадравага забеспячэння палкоўнік Дзмітрый Ляшэвіч. — Ён з’яўляецца сімвалам воінскага гонару, доблесці і славы, напамінам аб святым абавязку аддана служыць Рэспубліцы Беларусь. Веру, што кожны з вас будзе годна выконваць свае абавязкі па ахове Дзяржаўнай мяжы. Так, як гэта рабіў наш зямляк, ураджэнец Аршаншчыны Сямён Пустэльнікаў.

…5 лютага 1945 года застава ў адной з украінскіх вёсак была абстраляна фашыстамі. Пагранічнікі ўсту­пілі ў бой. Ворагі, якіх было дваццаць пяць чалавек, былі добра ўзброены і супраціўляліся з усіх сіл.  Але пад націскам савецкіх салдат пачалі адступаць у кірунку мяжы.

Яфрэйтар Сямён Пустэльнікаў разгадаў задуму ворага, ускочыў на каня і віхрам паімчаў наперарэз ненавіснікам. Ён вырашыў затрымаць фашыстаў да прыходу асноўных сіл — абагнаў іх і ўступіў з імі ў бой.

Будучы цяжка параненым, ён мужна змагаўся з немцамі, расстрэльваючы іх ва ўпор. Конь яфрэйтара быў забіты, Пустэльнікаў схаваўся за ім і працягваў страляць, скоў­ваючы дзеянні амаль двух дзясяткаў фашыстаў. Напачатку яны і не здагадваліся, што супраць іх дзейнічае толькі адзін чалавек.

Але ў Сямёна хутка скончыліся патроны, ён быў акружаны гітлераўцамі, якія хацелі ўзяць яго жывым. Смелы воін апошняй гранатай узарваў сябе і немцаў, якія да яго наблі­зіліся. Сваімі бясстрашнымі дзеяннямі, цаной свайго жыцця пагра­нічнік затрымаў ворага да прыходу байцоў заставы, што дапамагло цалкам знішчыць групу захоп­нікаў.

31 сакавіка 1945 года яфрэйтару Пустэльнікаву было пасмяротна прысвоена званне Героя Савецкага Саюза. Яго імем названы пагранічная застава, дзе служыў будучы герой, вуліцы ў Львове і  Оршы. 28 мая 2003 года Указам Прэзідэнта Рэспублікі Беларусь імя Сямёна Селі­верставіча Пустэльнікава прысвоена і заставе ў Лынтупах. Дарэчы, імянных падраздзяленняў у органах пагранічнай службы Рэспублікі Беларусь толькі трынаццаць.

— На прыкладзе гэтага героя мы павінны выхоўваць дух беларускага пагранічніка, — гаварыў на мітынгу намеснік старшыні раённага выканаўчага камітэта Юрый Кісялёў. — Наш зямляк з Оршы сваімі паводзінамі паказаў, якім павінен быць кожны беларускі ваеннаслужачы.

Павіншаваўшы прысутных са знакавай датай, Ю. М. Кісялёў уручыў памятны сувенір начальніку пагранічнай заставы “Лынтупы” старшаму лейтэнанту Кірылу Рудзе, а таксама Падзяку старшыні раённага выканаўчага камітэта старшаму тэхніку-начальніку аддзялення старшаму прапаршчыку Валерыю Кухальскаму.

Пасля выступлення перад гасцямі начальніка аддзела па справах моладзі райвыканкама Наталлі Субко і ветэрана Вялікай Айчыннай вайны Мікалая Зубовіча адбылося ўскладанне кветак да бюста С. С. Пустэльнікава. Закончыўся мітынг хвілінай маўчання і ўрачыстым маршам асабовага складу пагранічнай заставы.

Азнаёміцца з ёй маглі ўсе жадаючыя. Аб’ектаў для агляду было шмат: гэта гадавальнік для службовых сабак, бокс для абслугоўвання тэхнікі, памяшканне для падсобнай гаспадаркі, цяпліца… Нават для лынтупчан экскурсія была пазнавальнай: за варотамі заставы дагэтуль быў не кожны.

Завяршылася мерапрыемства тэматычным ранішнікам для ваеннаслужачых тэрміновай службы.

 Іна СНЯЖКОВА.

Фота аўтара.