«Поставщине паводок не угрожает. Но мы к нему готовы»

Сёлетняя зіма замест адведзеных ёй прыродай трох месяцаў заняла ажно чатыры. Лішні “зімовы” месяц аказаўся надзвычай снежным, падкінуўшы нямала праблем. З прыходам цяпла актыўнае раставанне снегу стварыла пагрозу паводкавай сітуацыі не толькі на поўдні Беларусі, але і ў цэнтральнай паласе і на поў­начы, дзе паводка бывае рэдка. Ці пагражае яна жыхарам Пастаўшчыны? З такім пытаннем карэспандэнт “ПК” Алена Шапавалава звярнулася да намесніка старшыні райвыканкама, старшыні раённай камісіі па надзвычайных сітуацыях П. Р. СТАНЮША.

— Безумоўна, снегу сёлета шмат, і гэта насцярожвае як нас, прадстаўнікоў камісіі па надзвычайных сітуацыях, так і насельніцтва. Але яго колькасць не катастрафічная, у некаторыя гады было і больш, — адзначыў Павел Радзівонавіч. — Папярэднія тыдні, калі днём слупок тэрмометра паднімаўся вышэй за нуль грудусаў, а ноччу апускаўся да мінусавых тэмператур, паспрыялі таму, што снежнае покрыва істотна зменшылася, а месцамі наогул знікла. І хоць рэкі па-ранейшаму скаваныя лёдам, не думаю, што яны могуць уяўляць сабой небяспеку з-за разліву. Калі ж паводка ўсё-такі здарыцца, мы да яе гатовы. Камісіяй, якую я ўзначальваю, распрацаваны адпаведны план мерапрыемстваў. Гэта тэма прысутнічала і на вучэннях па грама­дзянскай абароне, дзе ўсе заці­каўленыя службы спрацавалі зладжана і аператыўна. У раёне створаны запасы паліва, харчавання, ёсць неадходны рыштунак для эвакуацыі пацярпелых. Дарожнікамі яшчэ з восені былі ачышчаны ўсе водапрапускныя трубы пад дарогамі. Абследаваны падпорныя збудаванні і дамбы. Зараз мы рэгулярна, два разы ў дзень, вядзём маніторынг сітуацыі на вадаёмах Пастаўшчыны і на плаціне Варапаеўскай ГЭС — і ў ЖКГ, і ў РАНС замацаваны адказныя за гэта.

Увогуле, большую пагрозу, чым паводка, для нашага раёна ўяўляе талая вада. Ёсць дастаткова шмат месцаў, асабліва ў горадзе, дзе амаль штогод даводзіцца яе адкачваць. У прыватнасці, гэта вуліцы Кірычука, Асяненкі, Дубоўкі, Кааператыўная, дзе існуе прыроднае паніжэнне рэльефу, а скінуць ваду няма куды. Залівае вуліцы і двары і ў іншых мікрараёнах Пастаў, а таксама ў некаторых сельскіх населеных пунктах, аб чым паведамляюць іх жыхары. Таму сёння мы актыўна займаемся такой работай.