В Беларуси проводится профилактическая акция «Дом без насилия»

З мэтай папярэджання бытавога насілля, а калі яно здарылася — мінімізацыі цяжкіх наступстваў і прыцягнення грамадскасці да аказання дапамогі і садзейнічання дзяржаўным органам у вырашэнні праблем сямейнай нядобрана­дзейнасці ў нашай краіне з 15 па 30 красавіка праводзіцца прафілактычная акцыя “Дом без насілля”.

Сям’я — адна з найвялікшых каштоўнасцей. У моцнай, надзейнай сям’і мае патрэбу кожны чалавек. Ва ўмацаванні і пазітыўным развіцці сям’і зацікаўлена дзяржава. Таму праблема бытавой злачыннасці заўсёды застаецца актуальнай.

На жаль, год ад года не становіцца менш фактаў, калі ў ходзе высвятлення адносін паміж членамі сям’і здзяйсняюцца цяжкія злачынствы. Нярэдка ахвярамі становяцца непаўналетнія дзеці, бездапаможныя старыя. Нават у сем’ях, якія маюць імідж добрапрыстойных, здараецца “ціхае” насілле. Выявіць яго складана, бо тыя, хто церпіць, не рашаюцца звярнуцца па дапамогу не толькі ў дзяржаўныя органы, але і да родных або знаёмых. А калі іх цярпенне заканчваецца, можа здарыцца трагедыя. Вось таму так важна ўсім мірам выступіць супраць насілля. На што і нацэлена правя­дзенне акцыі.

Не буду спыняцца на ўсіх тых мерапрыемствах, якія намечана правесці падчас яе ў нашым раёне (па меры магчымасці мы будзем асвятляць іх на старонках газеты), а назаву тэлефоны, па якіх вы можаце паведаміць у раённы аддзел міліцыі пра факты насілля ў дачыненні да вас саміх або вашых родных, знаёмых, суседзяў. Яны наступныя: 4-12-02 або 102 (кругласутачна).

Нагадаю і аб тым, што ў сацыяльнай рэкламе агульнанацыянальнай інфармацыйна-асветніцкай кампаніі “Дом без насілля” (у ёй актрыса Юлія Высоцкая з экрана тэлевізара пераконвае ў тым, што на дамашняй кухні няма месца насіллю, а слёзы тут могуць праступіць толькі ад чысткі цыбулі) даецца нумар тэлефона “гарачай лініі”, на які могуць звярнуцца ахвяры дамашняга насілля: 8-801-100-8-801. Званкі прымаюцца бясплатна і ананімна. Званіць трэба са стацыянарнага тэлефона.

А ў аўторак, 16 красавіка, з 10 да 12 гадзін па тэлефоне 5-13-13 па пытаннях сямейнага насілля вас ананімна выслухае псіхолаг тэрытарыяльнага цэнтра сацыяльнага абслугоўвання насельніцтва.

Фаіна КАСАТКІНА.