Охрана труда: кто, как не сами?

21 студзеня 2011 года рашэннем раённага выканаўчага камітэта зацверджаны мерапрыемствы па паляпшэнні ўмоў і аховы працы, распрацаваныя на 2011-2015 гады. Іх выкананне знаходзіцца пад пастаянным кантролем. Пра тое, што зроблена ў гэтым напрамку на працягу мінулага года і якія захады трэба зрабіць, ішла размова на нядаўнім пасяджэнні раённага выканаўчага камітэта. 

Намеснік старшыні райвыканкама, старшыня раённай камісіі па ахове працы М. Р. Коваль праінфармаваў, што намечанае па ахове працы ў мерапрыемствах на 2012 год выканана ў поўным аб’ёме. На гэта зрасходавана 7128,0 мільёна рублёў. У арганізацыях раёна абсталяваны 3 новыя кабінеты, 24 куткі па ахове працы, палепшаны ўмовы працы на 144 рабочых месцах, адрамантаваны і ўведзены ў эксплуатацыю 47 санітарна-бытавых памяшканняў. У 75 арганізацыях дзейнічаюць сістэмы кіравання аховай працы. Праведзена 7 месячнікаў, накіраваных на аказанне дапамогі ў выяўленні і спыненні парушэнняў заканадаўства аб ахове працы, працоўнай і выканаўчай дысцыпліны, а таксама раённы агляд-конкурс на лепшую арганізацыю работы па ахове працы, 4 семінары.

Аднак асноўную ўвагу дакладчык звярнуў на неабходнасць далейшага ўдасканалення работы па забеспячэнні здаровых і бяспечных умоў працы. Летась здарылі­ся два няшчасныя выпадкі на вытворчасці: на Пастаўскім мэблевым цэнтры і ў ААТ “Янавіца-агра”, а ў лясгасе загінуў чалавек. У студзені гэтага года цяжкі няшчасны выпадак адбыўся на льнозаводзе. Усё гэта не можа не непакоіць.

У адпаведнасці з патрабаваннямі Дырэктывы Прэзідэнта Рэспублікі Беларусь №1 “Аб мерах па ўмацаванні грамадскай бяспекі і дысцыпліны” ў 2012 годзе за распіццё алкагольных напіткаў і знаходжанне на рабоце ў нецвярозым стане спынены працоўныя адносіны з 39 работнікамі, за прагулы — з 265-цю. Выяўлена 1087 парушэнняў заканадаўства аб ахове працы, адхі­лены ад работы 73 чалавекі, забаронена эксплуатацыя 51 адзінкі тэхнікі і абсталявання, аштрафавана 13 адказных асоб і 65 наймальнікаў.

У каапнарыхтпрамгандлі і каапгандлі №1 райспажыўтаварыства, ААТ “Янавіца-агра” работнікі не ў поўнай меры забяспечаны спецадзеннем, не заўсёды праводзяцца інструктажы, праверкі ведаў, стажыроўкі работнікаў. Запоўнены не ўсе вакантныя пасады спецыялістаў па ахове працы. Выяўлены і шэраг іншых недахопаў.

Па абмеркаваным пытанні прынята разгорнутае рашэнне, у якім дадзена ацэнка работы кадраў (некаторых — нездавальняючая або недастатковая), абазначаны канкрэтныя меры паляпшэння ўмоў і аховы працы і тэрміны, да якіх яны павінны быць ажыццёўлены. І трэба памятаць, што ў адказе за бяспеку працы ўсе: як службовыя асобы, так і радавыя выканаўцы.

Фаіна КАСАТКІНА.