Комайские «Сваякі» — лучшие

23 сакавіка ў аграгарадку Падсвілле Глыбоцкага раёна адбыўся абласны агляд-конкурс маладзёжных аматарскіх тэатраў сельскіх устаноў культуры “Тэатральныя далягляды вёскі”,  які традыцыйна праводзіцца раз у два гады. Дарэчы, тут збіраюцца сельскія тэатральныя калектывы вобласці ўжо ў трэці раз. Гэта невыпадкова, бо пры ўстанове дзейнічаюць аж два тэатры — народны маладзёжны тэатр мініяцюр “Ідучыя на смех” і ўзорны дзіцячы тэатр. Апошні, ярка ўвасобіўшы на сцэне п’есу-казку С. Кавалёва “Піліпка і Ведзьма”, стаў пераможцам сярод дзіцячых калектываў.

Пастаўчане прывезлі на суд аматараў і прафесіяналаў тэатральнага мастацтва камедыю В. Ткачова “Курорт для зяця” ў пастаноўцы тэатральнага калектыву “Пульс” Гуцкага СКЦ (рэжысёр Тамара Маслоўская), спектакль паводле п’ес А. Макаёнка “Добра, што добра канчаецца”, увасоблены тэатральным калектывам “Сваякі” Камайскага СДК (рэжысёр Галіна Бразюль) і забаўляльную праграму “А ў нас Саракі” народнага клуба “Юнчанка” Юнькаўскага СДК (кіраўнік Ніна Малец). Поўны гумару, з яркімі камедыйнымі персанажамі, сярод якіх прыцягвалі асаблівую ўвагу героі  Аляксея Кухальскага і Ула­дзіміра Балта, спектакль Гуцкага СКЦ быў адзначаны дыпломам за ўвасабленне твораў сучаснай беларускай драматургіі. “Юнчанка” атрымала ўзнагароду за 3-яе месца ў выставе “Смачны панадворак” (на конкурс на гэты раз запрашаліся і клубы нацыянальнай кухні). А сапраўднай падзеяй гэтага дня стала для ўсіх нас тое, што аматарскі тэатральны гурт “Сваякі” вясковых артыстаў з Камай стаў пераможцам (1-ае месца) у асноўнай намінацыі агляду-конкурсу “Драматычны спектакль”. Дыплом за лепшую жаночую ролю атрымала таксама ўдзельніца гэтага калектыву Вікторыя  Паўлава. Хочацца павіншаваць акцёраў-аматараў з поспехам, падзякаваць усім, хто дапамагаў годна паказваць выні­кі творчай працы нашых сельскіх устаноў  культуры на абласным узроўні, а таксама асобна выказаць падзяку работнікам СШ №3 за прадастаўленую ваенную форму і намесніку дырэктара ААТ “Камайскі-агра” па ідэалагічнай рабоце Юрыю Мар’­янавічу Плюту, які выконваў не толькі ролю ў спектаклі, але і ролю вадзіцеля, вырашыў пытанне з прыездам камайцаў на абласны агляд-конкурс, які стаў для іх сапраўдным трыумфам.

Л. ЧАТОВІЧ, метадыст раённага арганізацыйнага метадычнага цэнтра