Реклама: читаем и размышляем

Рэклама — не толькі рухавік прагрэсу, але для многіх і моцнадзейны раздражняльнік, асабліва калі раз-пораз назойліва перапыняе цікавую тэлеперадачу або фільм. Апошнім часам яна займае вялікае месца і ў нашай газеце, што, напэўна, выклікае незадаволенасць часткі чытачоў. Але рэдакцыя не мае права адмовіць рэкламадаўцам у размяшчэнні іх аб’яў. Трэба ўлічваць і тое, што менавіта дзякуючы росту выручкі ад рэкламы мы змаглі не павышаць падпісную цану на другі квартал, не зменіцца яна і да канца года.

Але сёння я хачу пагаварыць і пра іншае — якасць рэкламы, наша яе адчуванне, уменне давяраць або не. Звярніце ўвагу: у ніжнім левым вугле апошняй старонкі кожнага нумара напісана: аўтары матэрыялаў нясуць адказнасць за падбор і дакладнасць фактаў, рэкламадаўцы — за дакладнасць рэкламы. Вельмі важна чытаць рэкламу ўважліва і перш чым рабіць якія захады, дэталёва высветліць усе “падводныя рыфы”. Скажам, калі аб’яўляюцца скідкі на мэблю да 50%, то яны ж могуць быць і 10-15%, а то і яшчэ меншыя. Або банк прапануе крэдыты пад нізкі працэнт без прадастаўлення даведак і без паручыцеляў. Многія, не ўнікаючы ў тонкасці, бяруць іх. А вяртаць прыходзіцца… у два разы больш.

Змяшчалася ў “Пастаўскім краі” аб’ява “Паслуга “Аддзел кадраў”, у якой абяцаліся вакансіі і высокая (да 10 мільёнаў у месяц) зарплата. Рэкламадаўца (а гэта таварыства з абмежаванай адказнасцю “Інтэл-Страйд”) прадставіў рэдакцыі ліцэнзію, выда­дзеную Міністэрствам унутраных спраў Рэспублікі Беларусь. Пазней высветлілася, што людзі, якія званілі на ўказаны ў аб’яве нумар, працаўладкавацца так і не змаглі. Дарэчы, і ў самой аб’яве ўказвалася, што званок платны, і ў пачатку размовы (праўда, скорагаворкай) гучала: кошт адной хвіліны для фізічных асоб 25 тысяч рублёў, для арганізацый — 60 тысяч. Цікава, зыходзячы з чаго сфарміраваны такія цэны?

Адны, чуючы такія сумы, размову завяршалі хутка, другія, захопленыя перспектывай высокааплатнай работы, працягвалі яе і прагаворвалі немалыя сумы грошай. Каго вінаваціць у гэтым: рэдакцыю, што размясціла аб’яву, саміх сябе, што паддаліся “лахатрону”, або ўсё ж нядобрасумленную фірму? Таму я і паўтараю: чытайце рэкламу ўважліва і разважайце над ёй. Тады і непрыемнасцей удасца пазбегнуць.

Фаіна КАСАТКІНА.