Маленькие, а уже исследователи (+фото)

Вялікія праблемы могуць паспяхова падымаць і маленькія навукоўцы. У гэтым упэўнены арганізатары пошукава-даследчай канферэнцыі сярод вучняў 3-4 класаў. Трэці год запар яна праводзіцца ў СШ №5 і збірае ўсё большую колькасць удзельнікаў.

На канферэнцыі, якая адбылася 21 сакавіка, прысутнічалі прадстаўнікі 17 устаноў адукацыі Пастаўшчыны — і гэта абсалютны максімум за час яе правядзення. Як ніколі шырокім было і кола пытанняў, якое цікавіла маленькіх навукоўцаў.

З-за вялікай колькасці работ іх прэзентацыі адбыліся на трох “пляцоўках”. Самай шматлікай аказалася секцыя “Праблемы, пастаўленыя сучасным жыццём”, меншымі — “Здаровы лад жыцця” і “Гісторыя і краязнаўства”. У кожнай групе адбыліся творчыя абароны работ.

Вучні аргументавана даказвалі непрадузятаму журы, як шкодна карыстацца мабільнымі тэлефонамі, як карысна чытаць, займацца каратэ, вырошчваць хатнія расліны… За кожнай распрацаванай тэмай — факты, лічбы, меркаванні. Адным словам, няпростая, але цікавая даследчая праца.

—         Работа, якая праведзена вучнямі, вельмі карысная, — адзначыла арганізатар канферэнцыі, метадыст раённага аддзела адукацыі Наталля Уладзіміраўна Есьман. — Упэўнена, што мерапрыемства пашырыла далягляд школьнікаў, падарыла шмат новых ведаў. Спадзяюся, яны не спыняцца на дасягнутым і будуць у далейшым ­удзель­-нічаць у такіх мерапрыемствах.

Кожны са школьнікаў атрымаў сертыфікат ­удзельніка канферэнцыі. У секцыі “Праблемы, пастаўленыя сучасным жыццём” перамогу святкавалі вучні СШ №4, якія прэзентавалі праект “Музыка ў маім жыцці”. Другіх месцаў прысуджана два: вучням Камайскай СШ за работу “Навагодняя прыгажуня” і СШ № 2 за даследаванне “Уплыў навыку чытання на паспяховасць вучняў”. Дыпломам трэцяй ступені адзначана работа  “Мабільны тэлефон: сродак сувязі або цацка?” вучняў Дунілавіцкай школы.

Пераможцамі ў секцыі “Гісторыя і краязнаўства” журы прызнала даследаванне вучняў Варапаеўскай школы “Пра што расказваюць назвы вуліц нашага пасёлка”. “Срэбра” ў школьнікаў з Казлоўшчынскай СШ — за работу “Радаслоўная маёй сям’і”. Трэцяе месца заняло даследаванне вучняў СШ №1 “Мінулае і сучаснасць паперы”.

Найлепшай у катэгорыі “Здаровы лад жыцця” стала  работа  гуцкіх школьнікаў “Чаму карысная каша?”. Другое месца ў вучняў СШ № 3, якія прэзентавалі праект “Жавальная гумка: за або супраць”. “Бронза” дасталася курапольскім школьнікам — за работу “Каратэ: за або супраць”.

Але, як адзначылі арганізатары, абсалютна ўсе ўдзельнікі канферэнцыі выступілі годна. Падрыхтавацца да такога сур’ёзнага мерапрыемства, прымаць у ім ­удзел — гэта ўжо перамога.

  Іна СНЯЖКОВА.

Фота аўтара.