В Поставском профессиональном колледже выбрали лучшего по профессии (+фото)

Правядзенне ў Пастаўскім прафтэхкаледжы прадметных тыдняў заўсёды ўспрымаецца навучэнцамі на ўра: запамінальныя на ўвесь год падзеі і ўражанні гарантаваны. З 25 па 29 сакавіка свята заві­тала на спецыяльнасць “Гандлёвая справа. Грамадскае харчаванне”. Цэнтральным мерапрыемствам гэтых дзён стаў конкурс прафесійнага майстэрства “Лепшы па прафесіі-2013”, які 28 чысла адбыўся ў клубе каледжа.

Мерапрыемства падрыхтавалі майстры вытворчага навучання Л. Б. Катовіч, В. М. Клянтак і выкладчыца І. В. Мілта. За званне самай-самай змагаліся пяць канкурсантак — Анастасія Папова, Алена Артаева, Марына Баран, Маргарыта і Юлія Нікіціны). Іх шлях да перамогі пачаўся яшчэ напярэдадні: за некалькі дзён да фіналу дзяўчаты прадэманстравалі тэарэтычныя веды і ўменне выкладваць тавар. І ўжо з пэўным “багажом” балаў распачалі  конкурснае шоу. Ацэньвала яго журы на чале з намеснікам дырэктара па вучэбна-вытворчай рабоце Віктарам Дзмітрыевічам Філіпенкавым.

Першым этапам спаборніцтваў стала візітка. Дзяўчаты творча, у вершаванай і песеннай форме прадставілі сябе і сваю прафесію. У наступным конкурсе ім прапаноўвалася выступіць у якасці рэкламадаўцаў. Вось дзе разгулялася фантазія! Арыгінальныя касцюмы, артыстычная гульня — гучныя апладысменты кожнай з ­удзельніц былі заслужанымі.

Падчас трэцяга этапа пад назвай “Вырашэнне гандлёвых сітуацый” канкурсанткам зноў патрабавалася паказаць веданне тэорыі. Што яны паспяхова зрабілі — кожная з удзельніц атрымала максімальную колькасць балаў. А вось у наступным конкурсе — “Работа на касавым апараце” — вынікі істотна розніліся: не ўсе паказалі мінімальныя секунды і максімальную якасць працы.

У другой палове мерапрыемства адбыліся этапы “Глаз-алмаз” (дзяўчаты без шаляў вызначалі вагу круп) і “Осязатель-угадатель”, дзе яны вызначалі від тавару з заплюшчанымі вачыма — па кансістэнцыі, паху, смаку. Завяршылася свята конкурсам на ўважлівасць “Штосьці з памяццю маёй сталася” — патрабавалася вызначыць тавар, які знік з прылаўка.

Падвядзенне вынікаў аказалася няпростым: балы ўдзельніц былі блізкімі, перамогу заслужыла кожная. Але конкурс ёсць конкурс. Трэцяе месца прысуджана Алене Артаевай, другое — Анастасіі Паповай. “Лепшай па прафесіі” стала Марына Баран.

Усе дзяўчаты ўзнагароджаны дыпломамі, салодкімі пачастункамі ад ГА «БРСМ» і сувенірамі ад вучнёўскага прафсаюза.

Іна СНЯЖКОВА.

Фота аўтара.