Будет новый завод

Праграмай развіцця льняной галіны рэспублікі на 2013—2015 гады ў Віцебскай вобласці прадугледжана мадэрнізацыя двух заводаў, у тым ліку пастаўскага. Па сутнасці, гэта будзе новае сучаснае прадпрыемства, узводзіць якое БУ-126 ААТ “Будаўніча-мантажны трэст №16 горада Наваполацка”.

У свой час гэты трэст узводзіў у нашым райцэнтры такія маштабныя аб’екты, як заводы “Беліт” і “Паставымэбля”. Пры выбары падраднай арганізацыі ўлічваўся не толькі багаты вопыт наваполацкіх будаўнікоў, але і тое, што ў БУ-126 ёсць уласныя падраздзяленні па вырабе і мантажы металаканструкцый.

Калі я наведаўся на будоўлю, тут побач з іншымі работамі вёўся мантаж металічных перакрыццяў будучага памяшкання. Да гэтага быў закладзены фундамент, устаноўлены калоны. Модуль памерам 28х132 метры набывае ўсё больш выразны выгляд. Прараб філіяла БУ-126 Ула­дзімір Бохан адзначыў, што колькасць працуючых на аб’екце і аб’ёмы работ будуць узрастаць па меры таго, як запрацуе крэдытная лінія. Але як бы ні складвалася фінансаванне, да сярэдзіны мая будзе зроблена ўсё, каб завяршыць укладку фундамента пад абсталяванне. Новапалачане павінны таксама ўзвесці тры шахі для захоўвання сыравіны (работы ўжо вядуцца), новую кацелью, вагавое памяшканне, лабараторыю, добраўпарадкаваць тэрыторыю. На гэтыя мэты сёлета выдзяляецца каля 100 мільярдаў крэдытаў.

— У мінулым годзе на набыццё абсталявання, выкананне праектных і іншых работ было затрачана 30 мільярдаў рублёў інвестыцый, — адзначыў дырэктар завода П. І. Скурко. — Для выпрацоўкі доўгага валакна купілі бельгійскую лінію “Vanhauwaert”, якая павінна паступіць на завод у сярэдзіне краса­віка. Лінія кампактная, таннейшая па цане, а па прадукцыйнасці не ўступае лініям іншых замежных фірм. Яе мантаж будуць весці бельгійскія спецыя­лісты разам з супрацоўнікамі Мінскага навукова-практычнага цэнтра.

Новы завод разлічаны на перапрацоўку 10—12 тысяч тон трасты ў год. Акрамя нашага раёна, у сыра­вінную зону прадпрыемства сёлета ўвайшло некалькі гаспадарак Докшыцкага і Шаркаўшчынскага раёнаў.

На здымку: агульны выгляд будоўлі; брыгадзір будаўнікоў Аляксей Бельскі і газаэлектразваршчык Дзяніс Томка.

Тэкст і фота Пятра КУРЫЛОВІЧА.