Будет ли в Поставах «Евроопт»?

Калі ў Паставах адкрыецца “Еўраопт”? Гэта пытанне цікавіць многіх. Задаюць яго, звяртаючыся ў рэдакцыю, і чытачы “Пастаўскага краю”. Па нашай просьбе сітуацыю тлумачыць намеснік старшыні райвыканкама Мікалай Рыгоравіч Коваль, які курыруе гандаль у раёне:

— Прадстаўнікі “Еўраопта” звярнуліся ў Пастаўскі райвыканкам з просьбай размясціць у горадзе свой магазін. Мы не адмовілі ў гэтым. Прапанавалі адвесці зямельны ўчастак пры ўездзе ў пяты гарадок (на другі бок дарогі, насупраць устаноўленага самалёта) для ўзвядзення будынка пад магазін. Месца выдатнае — вароты горада. Побач два мікрараёны: вуліца Юбі­лейная і пяты гарадок, траса Мінск—Браслаў. Усе камунікацыі таксама блізка. Зручны пад’­езд, ёсць дзе разгарнуцца з абуладкаваннем стаянкі для транспарту. Укладвайце сродкі і будуйцеся на карысць сабе і гораду.

Але еўраоптаўцаў прываблівае іншы, менш затратны для іх варыянт. Яны жадалі б размясціць сваю гандлёвую сетку на “Беліце”, на незанятых заводскіх плошчах. Сапраўды, свабодныя плошчы там зараз ёсць. Затое няма пад’язных шляхоў і пляцовак, дзе можна было б разгружацца фурам. Праблема і з парковачнымі месцамі. Ужо цяпер перад белітаўскім рынкам у кірмашовыя дні немагчыма прыпаркавацца ўсяму транспарту, узнікаюць замінкі з уездам і выездам. А калі б тут адкрыўся “Еўраопт”, то колькасць транспарту павялічылася б у разы, прыязджала б сотня, а то і дзве аўтамашын. Стаянкі для такой іх колькасці няма, як і няма месца абуладкаваць ля “Беліта” другую. Па гэтай прычыне райвыканкам палічыў немэтазгодным размяшчэнне тут “Еўраопта”. Дарэчы, мы прапанавалі ім яшчэ адзін варыянт будаўніцтва новага магазіна — у мікрараёне шостага гарадка.

Такім чынам, пастаўчане пакуль будуць абыходзіцца без “Еўраопта”. Затое ў райвыканкам з цікавай прапановай звярнулася таварыства з абмежаванай адказнасцю “НавучПраект­Буд” — партнёр вядомай кампаніі “Norfa”. Яно зацікаўлена ў інвесціраванні грашовых сродкаў у будаўніцтва магазінаў харчовай групы тавараў (ад міні- да гіпермаркета) у Паставах і Варапаеве, якія пасля завяршэння будаўніцтва будуць перададзены для эксплуатацыі аператару “Norfa”. Такую прапанову раённыя ўлады, вядома ж, падтрымалі. Зараз паміж бакамі вядуцца перамовы.

Фаіна КАСАТКІНА.