Бассейн в детском саду «Криничка» открыт!

Вось і мінулі калядныя і навагодняе святы. Шмат радасці, весялосці і падарункаў прынеслі яны дзецям і дарослым. Кожнаму ёсць што ўспомніць.   Асабліва яркія, незабыўныя ўражанні засталіся ў хлопчыкаў і дзяўчынак, выхавальнікаў, іншых педагогаў і работнікаў дзіцячага сада “Крынічка”, што ў мікрараёне вуліцы Юбі­лейнай у Праставах. Пачатак 2013 года для іх азнаменаваўся адкрыццём плавальнага басейна. Радасць гэтай падзеі разам з выхаванцамі, усім калектывам раздзялілі старшыня райвыканкама В. С. Гутараў, яго намеснік Ю. М. Кісялёў, начальнікі ад­дзелаў выканаўчага камітэта: фінансавага — Л. М. Шэцка, фізічнай культуры, спорту і турызму — В. А. Захарэвіч, адукацыі — А. Я. Кашырын. 

—  Кіраўніцтвам краіны перад мясцовымі органамі ўлады пастаўлена задача рабіць усё для таго, каб дзеці ў Беларусі актыўна далучаліся да заняткаў фізкультурай і спортам, ужо ў малым узросце навучыліся плаваць, — адзначыў у сваім прывітанні В. С. Гутараў. — У выхаванцаў сада  №1 такая магчымасць з’явілася. Падарунак дзецям каштаваў амаль 600 мільёнаў рублёў, але яго вартасць і значнасць у іншым. Плаванне бу­дзе яшчэ больш умацоўваць іх здароўе, загартоўваць фізічна, а гэта самае галоўнае для бацькоў і грамадства. Цяпер трэба распрацаваць механізм, які дазволіць наведваць басейн хлопчыкам і дзяўчынкам з іншых дзіцячых устаноў. Набыўшы тут першапачатковыя навыкі, яны ў далейшым змогуць займацца плаваннем, удасканальваць сваё майстэрства ў басейнах фізкультурна-аздараўленчых комплексаў па вуліцах Савецкай і Станкевіча, дастойна выступаць на спаборніцтвах розных узроўняў.

Словы шчырай удзячнасці гасцям адрасавалі загадчыца дзіцячага сада Л. Я. Канчаніна, маці выхаванца С. В. Недзведзь. Яны падкрэслілі, што падзея, якой чакалі, нарэшце стала явай і дазволіць узняць фізкультурна-аздараўленчую работу яшчэ на вышэйшы ўзровень. tc «Словы шчырай удзячнасці гасцям адрасавалі загадчыца дзіцячага сада Л. Я. Канчаніна, маці выхаванца С. В. Недзведзь. Яны падкрэслілі, што падзея, якой чакалі, нарэшце стала явай і дазволіць узняць фізкультурна-аздараўленчую работу яшчэ на вышэйшы ўзровень. »

Дарэчы, нядаўна калектыў “Крынічкі” ўдзельнічаў у рэспубліканскай акцыі “Алімпізм і моладзь”, якая праходзіла ў Паставах, і ўдастоены спецыяльнага сертыфіката Нацыянальнага алімпійскага камітэта, Міністэрства адукацыі Рэспублікі Беларусь і іншых дзяржаўных органаў і грамадскіх арганізацый. Іх прадстаўнікі высока ацанілі работу па захаванні і ўмацаванні здароўя дзяцей, якая праводзіцца ў садку, адзначылі яе сістэмнасць, пераемнасць, укараненне ў практыку новых метадаў і тэхналогій. Дзіцячы сад з’яўляецца удзельнікам абласнога творчага праекта, сутнасць якога ў тым, каб з улікам новых магчымасцей і распрацовак яшчэ больш са­дзейнічаць аздараўленню, фізічнаму развіццю выхаванцаў. Цяпер у гэтым ім дапамогуць і заняткі ў басейне. Вучыцца плаваць будзе больш за 200 дзяцей малодшай, сярэдняй і старэйшай узроставых груп.

Адноўленыя пасля 20-гадовага перапынку басейн, а таксама раздзявалка, душ і іншыя памяшканні не параўнаць з тымі, што былі ў 90-ых гадах мінулага стагоддзя. Для іх абуладкавання выкарыстаны сучасныя матэрыялы, заменены сістэма ацяплення, іншыя камунікацыі. Зманціравана высокатэхналагічнае абсталяванне для ачысткі, падагрэву і падрыхтоўкі вады, якое цалкам адпавядае санітарна-гігіенічным і экалагічным патрабаванням.

Адкрыццё басейна ў садзе стала святам. Першымі прадэманстравалі ў ім паказальнае выступленне Пеця Трава, Даша Селядцова, Жэня Авін, Марат Пахомчык і Аня Мілта.

Тэкст і фота Пятра КУРЫЛОВІЧА.