Отдохнули сказочно!

29 снежня ў славутай сядзібе Зюзі Паазерскага сабраліся выпускнікі 2012 года, якія прыбылі на сваё першае рабочае месца ў Пастаўскі раён.

Рэзідэнцыю наведалі 42 маладыя работнікі — прадстаўнікі прадпрыемстваў і арганізацый з усяго раёна. Разам з імі былі намеснік старшыні райвыканкама Юрый Мікалаевіч Кісялёў, начальнік арганізацыйна-кадравага аддзела Уладзімір Зіноўевіч Гутар, начальнік аддзела па справах моладзі Наталля Мечыславаўна Субко і першы сакратар райкама БРСМ Іна Аляксандраўна Кацейка. Менавіта яны паклапаціліся, каб мерапрыемства пакінула найлепшыя ўражанні.

Маладыя спецыялісты сталі ўдзельнікамі яркага тэатралізаванага прадстаўлення, для іх была арганізавана экскурсія па сядзібе, дыскатэка з забаўляльнымі конкурсамі, падрыхтаваны пачастункі. Настрой стваралі сабе і самі. Так, маладыя работніцы АДРАЦ “Ветразь” паказалі жартоўную візітку, а педагог-арганізатар СШ № 3 Наталля Касцецкая прадэманстравала свае вакальныя здольнасці.

—      Адпачылі казачна, — падзялілася ўражаннямі юрысконсульт ААТ “Навасёлкі-Лучай” Святлана Каладзяжная. — На сустрэчу ехала з вялікай цікаўнасцю — наведаць сядзібу Зюзі Паазерскага ніяк не атрымлівалася, хоць і жыву недалёка — у Паставах. Эмоцыі ад мерапрыемства — толькі пазітыўныя. Сустрэла шмат сваіх знаёмых, сяброў, з якімі вучылася. Усе разам весела пакарагодзілі, паспявалі, патанцавалі ў кампаніі Дзеда Мароза, загадалі жаданні.

Нязмушаная абстаноўка выдатна спрыяла новым знаёмствам і працягу старых — маладыя работнікі сустрэліся ўжо другі раз за год. Першае,  больш афіцыйнае мерапрыемства з іх удзелам, адбылося ў верасні. Тады перад спецыялістамі выступілі прадстаўнікі раённай улады, кіраўнікі і спецыялісты арганізацый і прадпрыемстваў раёна.

Новыя нагоды сустрэцца зноў яшчэ абавязкова будуць. Адна з бліжэйшых — конкурс прафесійнага майстэрства маладых спецыялістаў “Шлях да поспеху-2013”, правядзенне якога запланавана сёлета.

   Іна СНЯЖКОВА. Фота Іны Кацейкі.