Берите пример, абитуриенты!

Гарады бярэ смеласць? Не, мэтанакіраванасць — упэўнены юны пастаўчанін Ягор Недзведзь, які вучыцца ў непрыступным для многіх школьнікаў ліцэі БДУ. Ён ведае, чаго хоча ад жыцця і смела крочыць наперад. Бярыце прыклад, абітурыенты!

— Ягор, калі ўпершыню даведаўся пра ліцэй БДУ?

—      Яшчэ ў восьмым класе. У Мінску праходзіў чэмпіянат рэспублікі па інтэлектуальнай гульні “Што? Дзе? Калі”, а ў ліцэі было арганізавана харчаванне. Мне вельмі спадабалася акружэнне, абстаноўка. Для сябе вырашыў: трэба як мага больш даведацца пра ўстанову і “штурмаваць” яе.

— Шмат часу аддаваў падрыхтоўцы да ўступных экзаменаў у ліцэй?

— Цэлы год. Ведаў: паступіць няпроста, некалькі гадоў назад конкурс даходзіў да чатырнаццаці чалавек на месца. Наведваў факультатыўныя заняткі па беларускай мове, займаўся з рэпетытарам па рускай. Цяжэй за ўсё было падрыхтавацца да экзамену па літаратуры. Вельмі шмат чытаў. Аказваецца, у беларускіх аўтараў столькі выдатных твораў! Думаў,  коласаўскія “Новую зямлю” і “На ростанях” буду чытаць сцяўшы зубы, а “праглынуў” — не паспеў агля­дзецца.

— Наколькі складанымі былі іспыты?  

— Для мяне заданні былі простымі — свой плён дала карпатлівая падрыхтоўчая  праца. Нічога звыш школьнай праграмы, проста трэба было ведаць яе паглыблена. Набраў 137 балаў з 200 магчымых, хаця ха­піла б і 125. Выбраў філалагічны кірунак — я заўсёды любіў мовы, падчас вучобы ў гімназіі ўдзельнічаў у раённых і абласных алімпіядах.

— Раскажы пра свае ліцэйскія будні.

— Абсалютная большасць часу прысвечана вучобе. У ліцэі займаюся з раніцы і да 15-16 гадзін, шмат часу ідзе на выкананне хатніх заданняў, асабліва па профільных прадметах. Чытаю ўсё больш і больш, асабліва падабаецца фантастыка — творы Стывена Кінга і Сяргея Лук’яненкі. Па-ранейшаму гуляю ў “Што? Дзе? Калі?”, толькі ўжо за ліцэйскую каманду.

— У Паставах часта бываеш?

— Раз-два ў чвэрць, а таксама на канікулах.  Тут родныя, сябры, хаця ўжо шмат таварышаў і ў Мінску. Там жыву ў інтэрнаце, умовы вельмі добрыя. Як і ўзровень адукацыі — у ліцэі працуюць сапраўдныя прафе­сіяналы. Я шчаслівы, што вучуся ў адным з найлепшых ліцэяў краіны.

— Куды збіраешся паступаць?

— У Інстытут журналістыкі Беларускага дзяржаўнага ўніверсітэта. Лічу гэта вельмі цікавым і перспектыўным. Ужо запісаўся ў гурток па журна­лістыцы, буду асвойваць новую для сябе справу.

— Поспехаў табе, Ягор!

Іна СНЯЖКОВА.

Фота з архіва Ягора Недзведзя.