Акция «Наши дети» шагает по Паставщине

Ужо каторы год у перыяд калядных і навагодніх свят у Беларусі праводзіцца акцыя “Нашы дзеці”. У гэты час у краіне (і Пастаўшчына — не выключэнне) ладзіцца шмат розных мерапрыемстваў для хлопчыкаў і дзяўчынак усіх узростаў, цэнтральнае месца сярод якіх займаюць навагоднія ёлкі. 

Як і ў папярэднія гады, у нашым раёне яны прайшлі ва ўсіх установах адукацыі, а таксама на большасці прадпрыемстваў і арганізацый для дзяцей работнікаў працоўных калектываў. 26 снежня 50 юных пастаўчан — пераможцаў і прызёраў прадметных алімпіяд, разнастайных аглядаў, конкурсаў, спартыўных спаборніцтваў — былі запрошаны на раённую ёлку ў сядзібу Зюзі Паазерскага, дзе кожны атрымаў падарунак ад старшыні раённага выканаўчага камітэта В. С. Гутарава. 25 школьнікаў пабывалі на губернатарскай ёлцы ў Віцебску, а тром пашчасціла трапіць на маляўнічае навагодняе прадстаўленне ў Палац Рэспублікі ў Мінску, на якім прысутнічаў Прэзідэнт краіны А. Р. Лукашэнка.

Акрамя таго, на Пастаўшчыне адбыўся шэраг дабрачынных ёлак для дзяцей-інвалідаў, з мнагадзетных, малазабяспечаных, апякунскіх і прыёмных сем’яў, якія праводзіліся на базе раённага цэнтра дзяцей і моладзі, а таксама для дзяцей, што засталіся без апекі бацькоў і знаходзяцца ў сацыяльна-педагагічным цэнтры. У ім 29 снежня пабывалі намеснік старшыні райвыканкама Ю. М. Кісялёў і начальнік раённага аддзела адукацыі А. Я. Кашырын, якія падарылі выхаванцам установы (а іх на сённяшні дзень 13) цукеркі, велатрэнажор і спартыўны гарадок.

Увогуле, прымаць гасцей у СПЦ пачалі ледзь не за два тыдні да Новага года. Першым 22 снежня сюды завітаў намеснік генеральнага дырэктара сталічнай фірмы “БелАВМ”, які прывёз малышам і падлеткам падарункі па іх пісьмах Дзеду Марозу і паабяцаў у бліжэйшыя дні пералічыць на рахунак цэнтра каля 10 мільёнаў рублёў на пакупку трэнажораў і абсталяванне трэнажорнай залы. Затым з цукеркамі, фруктамі і электрычнымі гірляндамі для ўпрыгажэння дзіцячых спальных пакояў прыехалі прадстаўнікі разлікова-касавага цэнтра ААБ “Беларусбанк” і аддзялення ААТ “Белаграпрамбанк” у г. Паставы. Не абышлося і без візітаў даўніх сяброў СПЦ — старшынь абласнога і раённага прафсаюзаў работнікаў дзяржаўных і іншых устаноў У. У. Мядзельца і Д. І. Пякарскай, якія арганізавалі для малых святочны абед і прадстаўленне з удзелам артыстаў народнага лялечнага тэатра “Вытварашкі”. А старшыня райкама прафсаюза работнікаў аграпрамысловага комплексу Б. П. Шылько парадаваў іх прысмакамі і падоранымі футбольнымі мячамі.

Навагоднія святы працягваюцца. Наперадзе — праваслаўнае Раство, да якога ў сацыяльна-педагагічным цэнтры чакаюць новых гасцей. Яркімі, незабыўнымі застануцца гэтыя зімовыя канікулы і для іншых дзяцей, якія цікава і з карысцю бавяць час. У тым ліку ў “рэзідэнцыі” пастаўскага Дзеда Мароза, куды арганізуюць экскурсіі для сваіх вучняў многія школы раёна.

Алена ШАПАВАЛАВА.