Хоть станция и промежуточная…

Начальнік станцыі П. А. Кавалёнак з білетнымі касірамі А. В. Скіпар, Т. С. Паўкштэла і Е. В. Фадзеевай.

Для жыхароў Пастаў, як і іншых населеных пунктаў раёна, што размешчаны побач з чыгуначнымі перагонамі, прывычнымі з’яўляюцца сігналы цеплавозаў, перастук калёс. Пад іх нараджаюцца і жывуць многія пакаленні пастаўчан, бо першы рух цягнікоў па вузкакалейцы ў  нашым рэгіёне пачаўся ў жніўні 1897 года. У 1915-ым была пракладзена шырокая чыгуначная каляя. Вакзал туліўся ў невялікай пабудове, і толькі ў 1954 годзе было ўзведзена цяперашняе памяшканне. Пасля рэканструкцыі ў пачатку ХХІ стагоддзя яно набыло сучасны выгляд. Расказвае начальнік станцыі Пётр Антонавіч Кавалёнак, які на гэтай пасадзе трэці дзясятак гадоў:

— Паставы з’яўляюцца прамежкавай грузапасажырскай станцыяй. Нягледзячы на гэта, яна адыгрывае важную ролю ў гаспадарчым комплексе не толькі нашага, але і суседніх, Мядзельскага і Браслаўскага раёнаў. Паслугамі чыгуначнікаў карыстаюцца больш за 40 прадпрыемстваў розных форм уласнасці. У іх ліку лясгас, Пастаўскі мэблевы цэнтр, хлебапрыёмнае прадпрыемства, Лынтупскі спіртзавод, райаграсэрвіс, “Паставымэбля”, вытворчы мэблевы цэнтр, філіял “ДРБУ-132”, УП ЖКГ, АБП “Рассвет Пастаўскі”, ільнозавод і іншыя.

З актывізацыяй эканамічных зносін прадпрыемстваў, нарошчваннем вытворчасці прадукцыі і спажывання сыравіны, матэрыялаў, угнаенняў назіраецца і рост паказчыкаў станцыі. Так, сярэднясутачная пагрузка складае каля 170 тон, выгрузка — 10 вагонаў. У параўнанні з папярэднім годам аб’ёмы ўзраслі амаль на 20%.

Нягледзячы на тое, што за апошняе дзесяцігоддзе ў раёне значна ўзрасла колькасць уладальнікаў асабістага транспарту, пашыраецца геаграфія і павялічваецца інтэнсіўнасць аўтобусных перавозак, чыгуначны транспарт застаецца больш танным і запатрабаваным. За суткі на нашай станцыі на пасажырскія і прыгарадныя цягнікі прадаецца ў сярэднім каля 200 білетаў, рост да мінулага года складае каля 30%. У касе ўкаранёна сістэма “Экспрэс-3”, што дазваляе пасажырам купляць білеты ў абодва бакі да любой станцыі  краін Садружнасці Незалежных Дзяржаў. Усё большае распаўсюджванне атрымлівае заказ білетаў праз інтэрнэт. У касе ўстаноўлены тэрмінал, таму разлікі можна праводзіць з выкарыстаннем банкаўскіх картачак.

На Беларускай чыгунцы было ажыццёўлена шмат розных праектаў. Адзін з іх датычыў аптымізацыі колькасці працуючых. У выніку ў нас склаўся калектыў з 16 чалавек. Гэта дзяжурныя, касіры, састаўляльнікі паяздоў, прыёмаздатчыкі. Сплаў вопыту і маладосці забяспечвае зладжаную работу ўсяго калектыву.

Мы памятаем і тых, хто ў свой час шмат зрабіў для таго, каб чыгуначная станцыя “Паставы” была сярод лепшых. Гэта былыя кіраўнікі І. Я. Рабаконь і М. Я. Пронька, а таксама І. В. Якубовіч, М. А. Касатая, Я. С. Кавалёнак, Н. А. Смірнова, Ч. Д. Шымковіч, В. А. Руткоўская і іншыя.