Реконструирована молочнотоварная ферма «Ляховщина»

аператары машыннага даення Наталля Жойдзь (справа) і Ніна Шаршнёва працуюць на абноўленай ферме ў Ляхаўшчыне.

У гэтым годзе ў філіяле “Нафтазаводмантаж-агра” праведзена рэканструкцыя  малочнатаварнай фермы “Ляхаў­шчына”.  Будаўнікі галаўнога прадпрыемства пастараліся на славу. Пакінуўшы толькі сцены старога памяшкання, яны фактычна занава адбудавалі яго: пера­крылі дах і столь, замянілі на новыя вокны і дзверы, сістэмы асвятлення, водапаення і выдалення гною. Пашыраны праход для механізаванай раздачы кармоў. Устаноўлены малака­правод, халадзільнік ёмістасцю тры тоны. Ацяпляецца падсобнае памяшканне, у якім абсталяваны пакой адпачынку. Заасфальтаваны пляцоўка для выгулу жывёлы, частка тэрыторыі ля фермы. Акуратны і яе знешні выгляд.

Аператары машыннага даення Наталля Жойдзь, Святлана Гапон і Ніна Шаршнёва, як і абслуговы персанал, задаволены створанымі ўмовамі. А ўвогуле, яны заслугоўваюць такой увагі і клопату, бо з’яўляюцца лідарамі спаборніцтва. За адзінаццаць месяцаў сярэдні надой малака ад каровы склаў 4317 кілаграмаў, а ў групе Наталлі Жойдзь — амаль 4600 кілаграмаў.

У цэлым па філіяле за апошнія два гады вытворчасць і рэалізацыя малака ўзраслі амаль на 50%. Прыбаўка атрымана дзякуючы росту прадуктыўнасці жывёлы на фермах “Ляхаўшчына” і “Сарокі”. На дзвюх астатніх — “Станелевічы” і “Ваўкі” — паказчыкі ніжэйшыя. Яны аднесены да неперспектыўных і будуць перапрафіляваны для вырошчвання буйной рагатай жывёлы. Але калі гэта здарыцца, пакуль сказаць цяжка.

Тым не менш, каб мець адпаведную зарплату, трэба нарошчваць аб’­ёмы вытворчасці і продажу жывёлагадоўчай прадукцыі. Дырэктар сельгасфіліяла  М. А. Лаўцэвіч лічыць, што гэтага можна дасягнуць дзякуючы рэгулярнаму ўзнаўленню статка. Што датычыць кармоў, то іх хапае.

Задуманае ажыццяўляецца. Побач з малочнатаварнай фермай “Ляхаўшчына” ўжо зманціраваны металічны каркас арачніка для ўтрымання 200 нецеляў. Ён будзе “абшыты” брызентам. Падрыхтавана і пляцоўка для клюшачніка, які  будзе перавезены з вёскі Рэдзькаўшчына.  Тут таксама будуць вырошчваць цялушак. Ужо на мільярд рублёў закуплены металічныя і будаўнічыя матэрыялы. У планах — рэканструкцыя памяшкання для вырошчвання буйной рагатай жывёлы і абнаўленне малочнатаварнай фермы ў Сароках. Кіраўніцтва і спецыялісты маюць надзею і на тое, што ў недалёкай перспектыве на цэнтральнай сядзібе будзе пабудавана сучасная робатызаваная ферма.

Тэкст і фота Пятра КУРЫЛОВІЧА