Юлия Жидкая: «Не хочу в артисты, хочу в милиционеры»

Напрыканцы года Паставы прагрымелі на ўсю краіну. У маштабным праекце тэлеканала “СТБ” “Поющие города” перамагла вучаніца СШ №3, выхаванка ўзорнага аматарскага калектыву эстраднай  вакальнай студыі “Юніта” раённага Дома культуры Юлія Жыдкая. Песня Вікторыі Алешка “Засталася” ў выкананні таленавітай пастаўчанкі пакарыла сэрцы пяці з паловай тысяч гледачоў.

Юлія стала найлепшай сярод тысяч вакалістаў, якія “штурмавалі” кастынгі ў дзясятках беларускіх гарадоў. З яркай перамогай дзяўчыну павіншавалі сотні чалавек. У іх ліку была і карэспандэнт “ПК” Іна СНЯЖКОВА, якая распытала юную трыумфатарку пра ўдзел у праекце.

—      Юлія, якія эмоцыі, уражанні пакінулі “Поющие города”?

— Шок. Я не думала, што змагу перамагчы ў гэтым тэлепраекце. Успаміны засталіся прыемныя. Мне было ганарова выступаць на галоўнай канцэртнай пляцоўцы краіны, мець зносіны з маім прафесійным куратарам — Вікторыяй Алешка.

—      Будзеш з ёй працягваць супрацоўніцтва?

— Я адмовілася. У маіх марах няма вялікай сцэны. Так, я спяваю даўно і з задавальненнем. Але гэта хобі, я не хачу, каб пастаянныя канцэрты, пераезды сталі ладам майго жыцця. Разумею, што дзякуючы перамозе перада мной адкрылася шмат магчымасцей. Але для мяне важней паспяхова закончыць школу, атрымаць адукацыю. Планую паступаць у Акадэмію Міністэрства ўнутраных спраў — хачу стаць міліцыянерам.

—      Падзяліся сакрэтам паспяховага выступлення.

— Я перамагла дзякуючы падтрымцы маіх бацькоў, родных, сяброў. Калі ўбачыла, колькі людзей за мяне прагаласавала — не магла паверыць. Вялікая заслуга майго педагога па вакале — кіраў­ніка  эстраднай вакальнай студыі “Юніта” Пастаўскага РДК Аксаны Анатольеўны Нікалаевай, якой я асабліва ўдзячна.

— Юлія, яшчэ раз віншую цябе з перамогай і жадаю, каб новы год стаў  больш багатым на яркія падзеі. 

Фота з архіва Юліі Жыдкай