ООО «Поставымебель» освоило выпуск мягкой мебели

работнікі ўчастка па вытворчасці мяккай мэблі (злева направа): брыгадзір А. М. Козел, станочнік П. П. Каравацкі, падрыхтоўшчык набівачных і насцілачных матэрыялаў А. А. Пястун, майстар участка У. М. Бяляеў і абіў¬шчык мэблі Д. М. Казлоў.

2012 год несумненна застанецца ў гісторыі аднаго з вядучых прадпрыемстваў раёна — ААТ “Паставымэбля”. Прычына гэтага — выпуск новай прадукцыі — мяккай мэблі, які асвоілі сёлета.

Над тым, каб арганізаваць на заводзе такую вытворчасць, дырэктар С. Р. Зямчонак задумваўся ўжо даўно. Па-першае, на мяккую мэблю ёсць пастаянны попыт у насельніцтва і арганізацый. Па-другое, у ёй выкарыстоўваюцца дарагія абівачныя матэрыялы і камплектуючыя. Таму на гэтым можна мець немалыя аб’ёмы і нядрэнны прыбытак, што дазволіць выплачваць дастойную зарплату работнікам і далей развіваць прадпрыемства. Але пачынаць усё з нуля, па словах Сяргея Рычардавіча, было боязна.

І вось лёс падарыў магчымасць ажыццявіць задуманае. У канцы сакавіка ў пошуках работы на “Паставымэблю” прыйшоў ураджэнец Віцебска У. М. Бяляеў, які большую частку жыцця пражыў у Эстоніі, меў там два ўласныя цэхі па выпуску мяккай мэблі і быў добра знаёмы з усёй тэхналогіяй яе вытворчасці.

— Ні хвіліны не сумняваючыся, я стварыў для Уладзіміра Міхайлавіча дадатковую штатную адзінку. Аформіў яго спачатку тэхнолагам, затым перавёў майстрам участка, — расказваў С. Р. Зямчонак. — Каб размясціць новую вытворчасць, пацяснілі лакафарбавы цэх, які напалову прастойваў, паколькі матэрыялы, якія выкарыстоўваем у рабоце, зараз ідуць у асноўным з фінішнай аддзелкай. Закупілі неабходны ручны інструмент, камплектуючыя, сучасны раскройны станок, прыстасавалі для выпуску мэблевых каркасаў дрэваапрацоўчы цэх — і ў канцы лета ўрачыста перарэзалі стужку на ўчастку мяккай мэблі.

Наперакор вядомай прыказцы першая партыя канап (а менавіта іх пачалі выпускаць на прадпрыемстве) не выйшла камяком і хутка была раскуплена сваімі ж работнікамі. Наступным крокам стала сертыфікацыя новай прадукцыі. Восенню яе ўзоры звазілі на спецыялізаваную выставу ў Мінск і атрымалі там дыплом “Паспяховы дэбют”. Зараз рыхтуюць да выпуску новы каталог мэблі, дзе яна таксама будзе прадстаўлена.

Пакуль у вытворчасць запушчаны тры мадэлі вуглавых і прамых канап, абцягнутых тканінай і скурзамам, якія рэалізуюцца ў гандлёвай сетцы Пастаў, а таксама ў магазінах Мінска, Мядзела, Браслава, Старобіна. Праблем з іх продажам няма. Канапы “Паставымэблі” карыстаюцца добрым попытам у пакупнікоў, бо якасную мяккую мэблю па даступнай цане на рынку сёння цяжка знайсці. Гэту нішу ўпэўнена займаюць нашы завадчане, якія паступова нарошчваюць аб’ёмы вытворчасці. У пачатку 2013 года плануюць выйсці на прыбытковую работу, а ў далейшым — і на двухзменную яе арганізацыю, набіраючы новых людзей (зараз на ўчастку працуюць усяго 5 чалавек) і расшыраючы мадэльны рад канап.

Алена ШАПАВАЛАВА.