Звёздный час «Атлант-Д»

“Залаты” склад каманды “Атлант-Д” сезона 2011/2012 гадоў.

Сёлета  споўнілася дваццаць гадоў, як каманда “Атлант-Д” заявіла пра сябе  ў першай лізе чэмпіянату Рэспублікі Беларусь па валейболе. Каля дзесяці разоў яна заваёўвала бронзавыя і сярэбраныя медалі.  А самым удалым і плённым выдаўся сезон 2011/2012 гадоў. Наша валейбольная дружына выйграла 25 сустрэч з 28-мі і ўпершыню заваявала званне чэмпіёна.

Гэтай перамогі чакалі шматлікія прыхільнікі самага папулярнага на Пастаўшчыне віду спорту, да яе настойліва і ўпарта ішлі самі валейбалісты. Увесь гэты час нязменным трэнерам каманды з’яўляецца начальнік аддзела фізічнай культуры, спорту і турызму райвыканкама В. А. Захарэвіч. Яго прозвішча добра вядома ў шырокіх валейбольных колах вобласці і рэспублікі. Ён выбраны першым намеснікам старшыні абласной федэрацыі валейбола.  Дзякуючы Васілію Аляксеевічу, які пераняў усё лепшае ад папярэднікаў, ветэранаў гульні, пастаўская валейбольная школа ўсё больш аўтарытэтна заяўляе пра сябе. У краіне наўрад ці зной­дзецца раённы цэнтр з 20-цю тысячамі жыхароў, дзе на працягу дзесяцігоддзяў мужчынскі валейбол займае лідзіруючыя пазіцыі. Прычым толькі дзякуючы мясцовым спартсменам, якія, дарэчы, з поспехам выступалі і выступаюць у іншых клубах і нават у нацыянальных зборных Беларусі.

Цяпер для атлантаўцаў самае галоўнае — даказаць, што мінулагодні поспех — гэта не выпадковасць. У яго аснове — настойлівая праца, патрыятызм, адказнасць перад самымі шчырымі і актыўнымі землякамі-балельшчыкамі. Быць на вышыні дапамагае і падтрымка, якую валейбалісты адчуваюць не толькі з боку кіраўнікоў калектываў, дзе працуюць, родных ім лю­дзей, але і з боку кіраўніцтва раёна. А гэтым летам спартсменам упершыню ўдалося правесці трэніровачны збор ля мора.

“Атлант-Д” удала стартаваў у ХХІІ чэмпіянаце Рэспублікі Беларусь. У новым сезоне згуляна ўжо 14 гульняў, і толькі ў адной  чэмпіёны ўступілі  сапернікам. Наперадзе шмат адказных матчаў. Верыцца, што каманда пры нашай падтрымцы захавае свой чэмпіёнскі тытул.

Тэкст і фота Пятра КУРЫЛОВІЧА.