В Поставском краеведческом музее открылись две новые выставки (+фото)

Т. А. Сабецкая

12 снежня ў раённым краязнаўчым музеі адкрыліся адразу дзве выставы. Аўтарам адной з іх з’яўляецца жыхар Полацка Іван Іваноў, актыўны ўдзельнік рыцарскага клуба “Полацкі звяз”, знаёмы пастаўчанам па выставе “Даспехі і зброя”, што экспанавалася ў музеі год назад. Другая належыць жыхарцы райцэнтра Таццяне Сабецкай, якая шмат гадоў адпрацавала ў прафтэхкаледжы кіраўніком “Творчай майстэрні”, якую сама ж і стварыла.

Іван Іваноў — выпускнік мастацка-графічнага факультэта Віцебскага дзяржаўнага ўніверсітэта імя П. М. Машэрава. Паралельна са сваім галоўным захапленнем — рэканструкцыяй рыцарскага касцюма — ён займаецца жывапісам і графікай. У апошняй тэхніцы нават аформіў дзве кніжкі для дзяцей беларускага пісьменніка Юрыя Усціновіча “Майстар Рукша” і “Яська і конік ягоны Грыўка”, якія падарыў нашаму музею. Што датычыць экспазіцыі, то на ёй прадстаўлены 23 жывапісныя работы — пейзажы і нацюрморты, выкананыя маслам на палатне.

Нацюрморты, але не намаляваныя, а вышытыя рознакаляровымі стужкамі і бісерам на чорным аксаміце, у вялікай колькасці прысутнічаюць і на выставе Таццяны Сабецкай. Называецца яна “Мая маленькая краіна” і з’яўляецца выражэннем унутранага свету аўтара, такога ж яркага і разнастайнага, як і яе работы. Акрамя памянёных вышэй вельмі прыгожых пано, тут прадстаўлены такім жа чынам вышытыя падушачкі і шкатулкі (іх Таццяна Анатольеўна робіць з “нуля”: прыдумвае форму, якую стварае з дапамогай кардону, а потым аздабляе звонку і знутры), вялізная ваза ва ўсходнім стылі з кветкамі, тапіарый — шар-свяцільнік, які ўвесь “расцвіў” імі, — навагодняя ёлка з пафарбаваных сярэбранай фарбай яловых шышак, калядны вяночак і шмат іншых прыгожых дробязей, якія вельмі ўпрыгожваюць інтэр’ер любога памяшкання і робяць яго ўтульным. У сваіх работах, многія з якіх выкананы ва ўласнай тэхніцы, майстрыха выкарыстоўвае самыя розныя матэрыялы: абрэзкі ўсемагчымых тканін, стужкі, тасьму, карункі, футра, ніткі, паперу, упаковачную сетку для букетаў, прыродныя матэрыялы і нават кампакт-дыскі.

Асобнае месца на выставе займаюць тэкстыльныя лялькі. Іх серыю Т. А. Сабецкая прысвяціла сваёй маленькай унучцы Арынцы і так і назвала яе — “Казкі для Арынкі”. Скульптурным тэкстылем жанчына захапілася ўсяго два месяцы назад, але ўжо атрымала ў інтэрнэце пахвальныя водгукі вядомых майстрых. Дарэчы, адтуль, з “сусветнага павуціння”, усё і пайшло.

— Неяк, блукаючы па сайтах і разглядваючы работы іншых рукадзельніц, я ўбачыла цудоўныя лялькі Алены Лаўрэнцьевай з Крамянчуга, якія вельмі спадабаліся, — расказвала Таццяна Анатольеўна. — Падумала: няўжо я так не змагу? Паглядзела некалькі майстар-класаў Лаўрэнцьевай — і цацкі пайшлі адна за адной.

Усе яны здзіўляюць сваёй рэалістычнасцю і характарнасцю, якія дасягнуты кожным шыўком аўтара. Між тым, асновай лялек з’яўляюцца драцяны каркас і сінтэпон, абцягнуты звычайнай панчохай. Для жадаючых навучыцца іх рабіць Т. А. Сабецкая гатова правесці ў музеі майстар-клас. Таксама ў яе можна заказаць эксклюзіўны падарунак на Новы год ці іншае свята для сваіх блізкіх і знаёмых — цацку, пано, вышыўку.

Застаецца дадаць, што абедзве выставы будуць працаваць у музеі да 11 студзеня 2013 года. Уваходны білет на іх каштуе 3000 рублёў для дарослых і 1500 рублёў для дзяцей. Акрамя таго, да праваслаўных Каляд тут чакаюць школьнікаў на музейна-педагагічныя заняткі “Навагоднія прыгоды ў музеі”.

Алена ШАПАВАЛАВА.

Фота аўтара.